—Nagsiring ka nga an ;akon amay nabulig han kabataan nga mga kablas, yana?
—Yana nananalinguha han ira nahihimo, nagpapakasurat kun usahay, — binmaton an batan’on.
—Kay ano man in kasugad?
—Tungod hiton ira mga gusi nga dugnit ngan hiton kaarawdon nga diri na sadang isiplat.
Hi Ibarra waray pagtingog.
—Pipira iton imo gintututduan yana? — nagpakiana tuyo in kasayod.
—Kapin hin duduha kagatos iton aada ha listahan ngan kakaruhaan la kaglima iton nabutho!
—Ano man in kasugad hito?
An magturutdo ha liburan nahapahiyom hin masamdong.
—Kun igsumat ko ha imo an nakakasugad halaba kaupay ngan masumo nga kaagi ig-asoy, — nganiya pa.
—Ayaw pakasiring nga inin akon pagpakiana usa la nga waray hinpapatungdan nga pagkasayod, -— nagsiring hi Ibarra nga, nahimuot, nagkikinita han kahigrayuan. — Nakapanhunahuna ako hin maupay; ha akon pagsabot kun tumanon ko an mga gintalinguha hadton akon amay makakaagi ako hin buruhaton nga mauruupay pa han pag tinangis ha iya, marumaypulos pa han pagdumot pag-ibinubulusan. An iya linubngan asya an marahalon nga Kahiladman ug an iya mga kaaway amo an bungto ngan hin usa nga padi: ginpapasaylo ko an bungto tungod han katapang, ngan gintatahod ko an padi tungod han iya katungdanan ngan tungod man liwat kay karuyag ko nga pagtahuron an Tuluuhan nga amo in naghatag han kapawaan han katig-uban. Karuyag ko magpalambrag han mga hunahuna hadton naghatag ha akon hin kusog, sanglit buot ko hisayuran kun ano an mga kakurian nga ginaagian dinhi han pagtutdo.(j)
—An aton tuna magdudumdom ha imo ha kamaihaan, senyor, kun matuman mo an magpakaruruyag nga talinguha hadton imo amay!—nagsiring an magturutdo.—Karuyag mo hibaruan an mga kakurian nga gintatara han pagtutdo? Kun asya man, ta, dida hinin aton yana kabutangan, kun diri kabuligan hin tapuran nga gahom an pagtutdo diri manta mahihimo, siyahan kay an kabataan waray pagkaaghat ug waray susgaranan, ikaduha tungod kay bisan pa pananglit may maada, binabagi han kawaray katigayunan nga bi-
