—Sayod man an Sr. Alperes nga hini nga mga adlaw diri ako say an nagdidinaog ngan gindidinaugan.
Linun'an han alperes hin hilaw nga tawa adto nga masakit nga bulos, nagpakabungulbungol na la, waray kaurit.
—Kundi, kaginuuhan, ambot kay ano nga say ginhihiruhimangraw in mga pagdaog ngan mga kapirdi, —bin. mul-ang an Alcalde; —ano in masisiring ha aton hinin mga maghigugmaon ug maghadong nga kadarangan'an nga nagpakatakos ha aton pagtampo? An baga ha akon, an ka- daragan'an daw sugad han mga arpas eolicas(4) kun magkatutnga han gab-i: kinahanglan pamatian ug panalingahan hin maupay an ira arangay ug malanoy nga tunog, nga nakakadara han kalag ngadto han mga langitnon nga nayon han paghingyap ug diri matapos nga...
—Nagsisiday hi V. E. ! —nagsiring an Escribano nga nalilipay, ngan hira ngaduha nanay-ong han kopa.
—Diri ako nahakakailob, —binmaton, nagpipinamahid han simod; —an panahon, diri ngani nakakaaghat hin pangawat, nakakaaghat hin pagsiday. Han batan'on pa ako nagsurat ako hin mga siday, ngan, ha inungod nga sumat, diri magraot.
—Kun sugad, hi V. S. naglingo han mga Musas(9) tungod kan Themis! —naniguro an aton korresponsal nga dudyaganon hin panngaran han kadidiyusan ha Mitolohiya.
—Pssh! ano an bubuhaton? An pagtara han magka-lainlain nga kahimtangan han tawo amo an unob ko nga hingyap. Hadto anay nanhugpong ako hin mga bukad ngan nag-awit ako hin mga siday, yana kinakaptan ko an tungkod ha panhukmanan ug nagtutuman ako han turumanon ko ha mga tawo, mga sano buwas...
—Mga sano buwas isusungo ni V. E. an tungkod basi mamay-dangdangan kun abuton na han mahagkot nga panuigon ngan say na man kakaptan an andulan hin usa nga Ministro, —sinmagbang hi P. Sibyla.
—Pss! tingali..ambot..an pagkaministro diri kay asya gud an akon hilig; bisan hino hito nga waray pa ngaran makakaabot. Mamay-usa ko la nga balay ha dapit Amihanan nga urukyan kun mga magpaso an panahon, usa nga hotel ha Madrid ngan hin kakadtuan ha Andalucia kun mga maghagkot... Didto pagpipinanumdumon ko na la an aton hinigugma nga Filipinas. . . Diri ako mapupulong ni Vol-
