463
namatay man liwat ngan didto iglubong ha panlubnganan han mga insik.
—Kairo man ni D. Anastasio!—nanhayhay hi D. Filipo; —an iya kababasahanan?
—Pinanunog han mga magpakidiyos kay asya an isip nira nga makakaupay sa Dios. Waray ko gud may nabawi, bisan na la an mga basahan ni Ciceron ... an gobernadorsilyo waray pagtalinguha pagpugong.
Ngaduha nangukoy.
Hadto ngahaw binati an masamdong ug mamingawon nga kanta han tuyaw.
—Maaram ka kun sano kakasla hi Maria Clara?— nagpakiana hi Iday kan Sinang.
—Ambot,— binmaton ini; —kinmarawat ako hin iya surat, kundi ha pagbirot nga hisayuran ko diri ko la ginbabasa. Kairo man ni Crisostomo!
—Nasiring nga kun diri tungod kan Linares binibitay hi Kapitan Tiyago, salit, ano in mabubuhat ni Maria Clara?
—nagyakan hi Victoria.
Linmabay in usa nga bata nga lalaki nga nag-iingka; ngadto tadong an dalagan ha plasa nga tinitikangan hanawit ni Sisa. Amo hi Basilio. Inabutan han bata an ira balay nga guba ug waray tawo; unina, katima hin damo nga pamakiana, nasayuran niya nga hi iya nanay tuyaw ngan naglilinakat ha bungto; mahatungod kan Crispin waray bisan mausa kapulong.
Pinahunob ni Basilio an iya mga luha, inilob an iya kasakit ngan bisan guol pa, kinadto niya pagbiling hi iya nanay. Inmabot hiya ha bungto, nagpakiana hiya ngan gilayon hindunggan niya an kanta. Inilob niya an kasuol han iya bitiis kay karuyag humangkop kan iya nanay.
An tuyaw pinmaantaw dida ha plasa ngan ngadto tadong ha tungod han balay han alperes. Yana, sugad anay, may bantay ha purtahan ngan may nahangaw nga ulo hin babayi ha tangbuanan, kundi diri na ulo han Medusa kay kanan usa na nga batan’on nga babayi; alperes ngan hin kawaray palad diri magsama.
Tinmikang hi Sisa pagkanta ha tungod han balay, ngadto pagsisiniplat han bulan nga nalunghayaw ha langit ha butnga hin magbusag nga dampog. Ginkikinita ni Basilio kundi waray hiya gagahom pagduok, tingali kun naghuhulat hiya nga lumakat didto, naglilinakatlakat hiya, pasingadto,
