[᭓᭓ 33 B]
᭓᭓
ᬩ᭄᭞ᬭᬭᬶᬲ᭄ᬗᬦ᭄ᬤᭂᬓ᭄ᬧᬮᬶᬗ᭄ᬕᬶᬳᬦ᭄ᬚᬗ᭄ᬕᭂᬮ᭄ᬧᬫᬃᬕᬶᬦᬾᬲᬫᬶ᭟ᬗᬦ᭄ᬤᬶᬓᬵᬭᬶᬂᬳᬶᬤᬵᬩᬸᬂᬫ᭄ᬩᬂᬦᬄᬢᬓᭀᬦᬶᬦ᭄ᬢᬸᬫ᭄ᬩᬾᬦ᭄ᬫᬍᬄᬤᬶᬦᬶ᭞ᬳᬶᬤᬵᬫᬤᬾᬦ᭄ᬧᭂᬲ᭄ᬮᬳᬸᬢ᭄ᬫᬗᬾᬩ᭄ᬭᬲᬂᬫᬢᬦ᭄ᬤᬂ᭞ᬲᬸᬩᬧᬳᭂᬓ᭄ᬗᭂᬳᭂᬤ᭄ᬧᬧᭂᬲᭀᬦᬾᬳᬮᬸᬲ᭄᭞ᬢᬶᬢ᭄ᬬᬂᬓᬳᬸ
ᬢᬸᬲ᭄ᬦᬢᬲᬂᬲᬧᭂᬲᬶᬭᬚᭂᬧᬸᬦᬶᬓᬶ᭟ᬳᬶᬗ᭄ᬕᬶᬄᬤᬸᬭᬸᬲᬂᬦ᭄ᬤᬶᬓᬬᬂᬫᬗ᭄ᬤᬾᬚᬦ᭄ᬢᭂᬦ᭄ᬭᬾᬄᬢᬶᬢ᭄ᬬᬂᬓᬳᬸᬢᬸᬲ᭄ᬦᭂᬢᭂᬲᬶᬦ᭄᭞ᬧᬸᬦᬧᬶᬓᬃᬬ᭄ᬬᬦᬾᬭᬢᬸ᭞ᬫᬮᬶᬄᬤᬶᬚᬵᬦ᭄ᬕᬭᬵ᭞ᬬᬦ᭄ᬧᬸᬦᬧᬶᬮᬶᬗ᭄ᬕᬶᬄᬳᬾᬳᬶᬧᬶᬤ᭄ᬭᬯᬸᬄ᭞ᬓ᭄ᬦᬶᬩ᭄ᬘᬶᬓ᭄ᬳᬦ᭄ᬢᬸᬓ᭄ᬢᬶᬢ᭄ᬬᬂᬫᬢᬸᬃᬭᬶᬂᬳᬶᬤ᭄ᬯᬕᬸᬂᬳ
ᬚᬶ᭟ᬓᭀᬭᬢᬸᬫᬮᬶᬄᬓᬾᬫᭂᬗᬦ᭄᭞ᬭᬱᬵᬮᬶᬓᬤ᭄ᬢᬸᬕᬓ᭄ᬫ᭄ᬱᬸᬯᬂᬫᬸᬜᬶ᭞ᬩᬦᬾᬢ᭄ᬯᬭᬦᬯᬂᬳᬸᬦ᭄ᬤᬸᬓ᭄ᬳᬧᬵᬓᬾᬢᭀᬫᬩᬱᬵ᭞ᬫᬢᭀᬮᬶᬳᬦ᭄ᬓ᭄ᬜᭂᬫ᭄ᬫᬗᬦ᭄ᬤᬶᬓᬵᬳᬮᬸᬲ᭄᭞ᬩᬧᬵᬦᬄᬳᭀᬭᬳᬶᬦ᭄ᬢ᭄ᬬᬂ᭞ᬳ᭄ᬜᬾᬦᬾᬓᬳᬸᬢᬸᬲ᭄ᬦᬶᬓᬶ᭟ᬳᬶᬩᬦ᭄ᬤᬾ
ᬱᬵᬫ᭄ᬧᭂᬲᬗ᭄ᬕᬵᬫᬢᬸᬃᬳᬭᬶᬲ᭄ᬳᬶᬗ᭄ᬕᬶᬄᬭᬢᬸᬦᬶᬓᬶ᭞ᬫᬸᬍᬲᬗ᭄ᬕᬄᬢᬶᬢ᭄ᬬᬂᬭᬢᬸᬳᬶᬤᬵᬩ᭄ᬭᬄᬫᬡ᭄ᬦᬩᭀᬤ᭄ᬥᬘᭀᬓᭀᬃᬭᬢᬸᬓ᭄ᬜᭂᬫ᭄ᬭᬲᬫᭂᬫ᭄ᬩᬄᬚᬸᬭᬸᬄ᭞ᬓᬮᬶᬗᬦᬾᬭᬢᬸᬳᬶᬤᬵᬜᬫᬦ᭄ᬢ᭄ᬬᬂᬢ᭄ᬯᬭᬳᬸᬦᬶᬂ᭟ᬳᬓᬾᬦᬾᬓᬦ᭄ᬤᭂᬳᬢᬸᬭᬂᬭᬶᬂᬧᬮᬶᬗ᭄ᬕᬶᬄᬳᬶᬤᬵ
[᭓᭔ 34 A]
ᬳᬶᬤ᭄ᬯᬕᬸᬂᬳᬚᬶ᭞ᬮᬸᬍᬜᬤ᭄ᬬᬢ᭄ᬬᬂᬤᬕᬸᬲ᭄ᬧ᭄ᬤᭂᬓ᭄ᬫᬳᬶᬫᬗ᭄ᬦᬄ᭞ᬤᬾᬦᬶᬂᬢ᭄ᬬᬂᬫᬸᬍᬧᬋᬓᬦ᭄ᬲᬢᬸᬳᬸ᭞ᬳᬸᬮᬶᬤᬶᬦ᭄ᬕᬭᬵᬤ᭄ᬳᭂᬫᬗᬶᬭᬶᬂᬓᬩᬸᬦ᭄ᬢᬂᬩᬦ᭄ᬢᬶᬂ᭟ᬳᬸᬮᬶᬘ᭄ᬭᬶᬓ᭄ᬢ᭄ᬬᬂᬫᬋᬓᬦ᭄᭞ᬭᬶᬂᬳᬶᬤ᭄ᬯᬕᬸᬂᬧᬸᬢᬺᬳᬕᬸᬂᬲᬬᬂᬕᬢᬶ᭞ᬢ᭄ᬬᬂᬫᬤᬦ᭄ᬳᬶᬤᬵᬩᬕᬸᬲ᭄ᬗᬸᬭᬄᬤᬸᬓᬾ
ᬤᬶᬤ᭄ᬳᭂ᭞ᬚᬦᬶᬲᬸᬭᬸᬤ᭄ᬢ᭄ᬬᬂᬤᬤᬶᬲᬢ᭄ᬭ᭄ᬬᬳᬕᬸᬂ᭞ᬩᬦ᭄ᬤᬫᬶᬦᬾᬫᬗᬼᬮᬦᬵᬫᬲᭂᬲᬺᬧ᭄ᬗᬮᬶᬄᬕᬸᬲ᭄ᬢᬶ᭟ᬦᬄᬳᬓᬾᬢᭀᬤᬤᬾᬅ᭄ᬳᬢᬸᬭᬂᬭᬶᬂᬳᬶᬤ᭄ᬯᬕᬸᬂᬳᬶᬩᬸᬂᬫ᭄ᬩᬂᬫᬢᬹᬃᬓ᭄ᬜᬶᬂ᭞ᬳᬭᬄᬢᬼᬩ᭄ᬜᬦᬾᬫᬸᬧᬸᬢ᭄ᬧᬘᬂᬗᬚᬓ᭄ᬫᬋᬓᬦ᭄᭞ᬮᬾᬦ᭄ᬢᭀᬗ᭄ᬦᭀᬢ᭄ᬲ᭄ᬩᭂᬗᬾᬳᬍᬧ᭄ᬫᬧ
ᬳᬸᬢ᭄᭞ᬢ᭄ᬓᬾᬦ᭄ᬕᭀᬩᬦᬾᬫᬜᬤᬤ᭄᭞ᬫᬶᬲ᭄ᬝᬶᬫᬗᬸᬳᬸᬕᬂᬕᬸᬫᬶ᭟ᬬᬦ᭄ᬤᬶᬦᬶᬳᬶᬤᬵᬫᬓ᭄ᬚᬂᬳᬶᬤᬾᬯᬕᬸᬂᬧ᭄ᬤᬲ᭄ᬫᬗᬳᬾᬓᬮᬶ᭞ᬓᬾᬢᭀᬓ᭄ᬦᭂᬄᬜᬦᬾᬮᬳᬸᬢ᭄ᬫᬧᬫᬶᬢ᭄ᬫᬗᬢᬸᬭᬂ᭞ᬲᬸᬩᬓᬢᬸᬃᬩᬸᬓᬵᬧᬶᬓᬦ᭄ᬤᬦᬾᬩᬳᬸ᭞ᬫᬓ᭄ᬚᬂᬳᬸᬲ᭄ᬓᬧᬶᬤᬃᬢ᭄ᬣᬳᬶᬤ᭄ᬯᬕᬸᬂᬓ
ᬕ᭄ᬬᬢᬦ᭄ᬱᬶᬧᬶ᭟ᬢ᭄ᬥᬸᬦ᭄ᬫᬗ᭄ᬭᬭᬶᬲ᭄ᬓᬢᬫᬦ᭄ᬧ᭄ᬭᬫᬾᬦᬓᬾᬲᬫᬶᬧᬤᬵᬫᬗᬶᬭᬶᬂ᭞ᬤᬶᬩᬜ᭄ᬘᬶᬗᬄᬳᬶᬤᬵᬫ᭄ᬮᬸᬗ᭄ᬕᬸᬄᬤᬶᬩᬮᬾᬲ᭄ᬓᭂᬤᬱᬵ᭞ᬘᭀᬓᭀᬃᬭᬢᬸᬓ᭄ᬱᬾᬗᬦ᭄ᬢᬦ᭄ᬲᬶᬕᬲᬶᬕᬸᬦ᭄᭞ᬚᬾᬂᬗ᭄ᬕ᭄ᬮᬃᬢᬗ᭄ᬓᭂᬧᬾᬧᬺᬢᬫ᭞ᬕᬳᭀᬓ᭄ᬢᬗ᭄ᬓᬶᬮᬦᬾᬲᬫᬶ᭟ᬲᬸᬩᭂᬧᬳᭂᬓ᭄
Page:Bali-lontar-gaguritan-cokoratu-02-250ppi.pdf/34
This page has been proofread.
