फावट ताका अटक जाली. तशेंच 16 म्हयने ताणें बंदखण भोगल्या. 15 ऑगस्ट 1972 ह्या दिसा भारत सरकारान ताम्रपत्र दिवन ताचो भोवमान केला. - कों. वि. सं. मं.
देसाय, वसंत विठ्ठल : (जल्म : 19 जुलय 1939, पीर्ण - बारदेस). सुटकेझुजारी. ताणें विद्यालयीन शिक्षण मराठींतल्यान घेतलें. 1953त तो 'नॅशनल काँग्रेस गोंय' हे संघटनेचो वांगडी जालो. शिवोली, कांयसूव, पीर्ण आनी कामुर्ली ह्या सुवांताचेर तो बसकां आयोजीत करतालो. तशेंच बांदा, बेळगांव आनी दोडामार्गार बसकांनी वांटो घेवंक तो वतालो. थंयसावन राश्ट्रवादी पत्रिका, पुस्तकां हाडून त्यो बारदेसांत वांट्टांल्लो. तशेंच शिमेवयल्या राश्ट्रवाद्यांक गोंयच्यो राजकीय हालचालीं कळयतालो. तेन्ना ताका धरपाचें फर्मान काडिल्लें. पीर्णां सत्याग्रहांत ताणें वांटो घेतिल्लो. पुर्तुगेड पोलिसांनी ताका धरलो आनी ताका 12 वर्सां बंदखणीचीं ख्यास्त फर्मायली. 20 ऑगस्ट 1959 दिसा चार वर्सां आनी आठ म्हयने बंदखण भोगले उपरांत ताची सुटका जाली. भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, वासुदेव पांडुरंग फळ : (जल्म : 30 सप्टेंबर 1934, पैंगीण - काणकोण). सुटकेझुजारी. ताणें विद्यालयीन शिक्षण मराठींतल्यान घेतलें. 'नॅशनल काँग्रेस गोवा' हे संघटनेचो तो वांगडी आसलो. 1954-55 ह्या काळांत तो वण्टीपत्रकां लावप, राश्ट्रीय पुस्तकां वांटप असलीं कामां करतालो. 26 जानेवारी 1955 ह्या दिसां ताणें आपल्या वांगड्यांसयत पैंगीणच्यान मिरवणूक काडून सत्याग्रहांत वांटो घेतलो. वाटेर भाटपाल - श्रीस्थळा ताका धरलो आनी खूब मार दिलो. ताका 8 वर्सां खर बंदखणीची ख्यास्त फर्मायली, तशेंच दिसाक 10 इश्कूद हेप्रमाण 2 वर्सां दंड भरूंक लायलो. 15 वर्सां खातीर ताचे नागरी हक्क काडून घेतले. 1959 वर्सा सगळ्या कैद्यां वांगडा ताचीय सुटका जाली. भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, वासुदेव व्यंकटेश फळ : (जल्म : 13 ऑक्टोबर 1927, पैंगीण - काणकोण). सुटकेझुजारी. ताणें मुळावें शिक्षण मराठींतल्यान घेतलें. जून 1946 सावन तो 'राष्ट्र सेवा दलां'त वावर करतालो. तशेंच प्रभातफेरयांनी वांटो घतालो. 26 जानेवारी 1955 दिसा हातांत तिरंगी बावटो घेवन पैंगीण ते मोखरदमल मेरेन जाल्ले मिरवणुकींत ताणें वांटो घेतिल्लो. तेन्ना पोलिसांनी ताका धरलो आनी खूब मार दिलो. फुडें प्रदेशीक लस्करी न्यायालयामुखार उबो करून ताका णव वर्सां बंदखणीची ख्यास्त फर्मायली. तेभायर दंड भरपाये बदला आनीक दोन वर्सां ख्यास्त दिली. भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, विठोबा नारायण राउत : (जल्म : 2 मार्च 1912, असोल्डें - केपें). सुटकेझुजारी. ताणें मुळावें शिक्षण मराठी आनी पुर्तुगेजींतल्यान तशेंच प्रिमैर कुर्स द इश्कोल रेजीमेन्ताल हेंय शिक्षण घेतलें. ताणें सुटके चळवळींत वांटो घेतलो तेन्ना ताका पुर्तुगेज पोलीस विभागांतल्यान काडून उडयलो. 'आझाद गोमंतक दल' संघटनेचो तो वांगडी आशिल्लो. बसकांनी वांटो घेवप, मिरवणुको काडप असलो वावर तो करतालो. 18 जून 1956 ह्या दिसा पोलिसांनी ताका धरलो आनी दोन वर्सां आग्वाद बंदखणींत दवरलो. थंय ताक पोलिसांनी खूब त्रास दिले. भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, विश्वासराव जसवंतराव : (जल्म : 18 जून 1934, तुयें - पेडणें). सुटकेझुजारी. ताणें विद्यालयीन शिक्षण मराठींतल्यान घेतलें. 'नॅशनल काँग्रेस गोवा' हे संघटनेचो तो वांगडी आसलो. 16 सप्टेंबर 1954 ह्या दिसा ताणें सुटकेझुजारी ओलिविन्यु बी कुएल्ल्यु हाच्या मार्गदर्शनाखाला तेरेखोल किल्ल्याचेर जाल्ल्या सत्याग्रहांत वांटो घतिल्लो. पुर्तुगेज पोलिसांनी ताका घरलो. प्रदेशीक लस्करी न्यायालयामुखार उबो करून ताक णव वर्सां खर बंदखण आनी तीन वर्सां सादे बंदखणीची ख्यास्त फर्मायली. डिसेंबर 1958त सगळ्यां वांगडा ताचीय सुटका जाली. बंदखणींतल्यान सुटका जाले उपरांत तो परतो सुटके चळवळींत वांटो घेवंक लागलो. भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, विष्णू पांडुरंग फळ : (जल्म : 15 एप्रिल 1905, काणकोण). सुटकेझुजारी. ताणें मराठी आनी पुर्तुगेजींतल्यान मुळावें शिक्षण घेतलें. सुटकेझुजाऱ्यांक राजकीय वावर करूंक तो आदार दितालो. 20 सप्टेंबर 1953 ह्या दिसा पोलिसांनी ताका धरलो, खूब मार दिलो आनी बंदखणींत दवरलो. 12 मार्च 1958 दिसा ताची बंदखणींतल्यान सुटका जाली. फुडें 15 जानेवारी 1960 दिसा परतो धरलो आनी 14 मार्च 1960 दिसा ताका सोडलो. 1972त भारत सरकारान ताम्रपत्र दिवन ताचो भोवमान केला.
- कों. वि. सं. मं.
देसाय, शाबू बाबनी नायक : (जल्म : 8 जानेवारी 1930, कुंकळ्ळी - साश्ट). सुटकेझुजारी. ताणें माध्यमिक मेरेन शिक्षण घेतलें. 'आझाद गोमंतक दल' संघटनेचो तो वावुरपी वांगडी आशिल्लो. कुडाळाक घडोवन हाडिल्ल्या गनिमी काव्यांविशीं प्रशिक्षण केंद्रांत ताणें वांटो घेतिल्लो. दलाच्या कमांडो फोर्सांत तो दाखल जाल्लो. जून 1954त नगर हवेलीच्या हत्यारबंद वावारांनी ताणें वांटो घेतिल्लो. नगर हवेलीचे सुटके उपरांत तो दत्ताराम उत्तम देसाय हाच्या मार्गदर्शनाखाल माजाळे फांट्यांत वावर करूंक
