बाजारांत कॉर्नफ्लोअर ह्या नांवान मागणी आसा. मक्याच्या आंकुरापकून भांगरा केराचें हळदुवें तेल काडटात. ह्या तेलाचो उपेग भारतांच शाब्बाच्या उद्येग धंद्यांत करतात. अमेरिकेंत हें तेल शुध्द करुन काद्यतेल म्हूण उपेग करतात. केक, बिस्कीट आनी मार्गारीन तयारव करपा खातीर ह्या तेलाचो उपेग करतात. तशेंच तेल काडून उरिल्ली पेंड जनावरांक खावंक घालतात. मक्याच्या दाण्यापसून काडिल्ल्या स्टार्चाचेर संस्करण करुन डेक्स्ट्रोज,कॉर्न सिपर आऩी कॉर्न स्टार्च तयार करतात. कॉर्न सिपर हें मिठाय, जेली, वखदांनिर्मिती, तंबाखूवयली प्रक्रिया हांचेखातीर उपेग करतात. दाण्यांतल्या अंकुरापसून तेल काडटात. तशेंच ताचेर संस्करण करुन झाईन नांवाचें प्रथिन आनी अँमिनो अम्लां तयार करतात. झाइना पसून लोकरीवरी कृत्रिम धागो तयार करतात.
मक्याच्या बोंडाभायर उरिल्ल्या हेर झाडचोय वापर वेगवेगळ्या उद्येग धंद्यांनी करतात. इमारतीचें बांदकाम, कागद, स्फोटक वस्तुंचे उत्पादन, सूत, भरण साहित्य हांचे खातीर खोडाचो उपेग करतात. मक्याच्या बुरखुंडाचो(कणसाच्या भितल्लो घट भाग)गुड्डेवरी उपेग करतात. तशेंच सादीं घरां बांदपाखातीर रेंव आनी शीमीट हांच्यांत भरसून, नळ तयार करपाखातीर हाचो उपेग करतात. बुरखुंडापसून फुरफुराल नांवाचो रंगहीन आनी तेलावरी द्रव पदार्थ तयार करतात. हो द्रवपदार्थ प्लॉस्टिक, नायलॉन आनी हेर उत्पादनांत कच्चो म्हाल म्हूण वापरतात.कणसांवयलीं आवरणां सिगरेटीच्या कागदनिर्मिती खातीर वापरतात.
मक्याच्या झाडाक जायते रोग आनी किडी पडटात. कवकां, सुक्ष्मजंतू आनी व्हायरस हाकालागून जावपी रोग खोड, पानां आनी कणसां हांचेर दिसून येतात. कवकजन्य रोगः
(अ) पानावयले रोगः१)करपाःड्रेक्स्लेरा टर्सीका ह्या कवकाक लागून जावपी ह्या रोगाखातीर पिकाचेर बोर्डो मिश्रण वा कवकनाशकाचो फवारो मारतात.
२)केवरः स्क्लेरोस्पोरा वंशांतल्या जायत्या जडातींक लागून हो रोग जाता. हाचेर उपाय म्हळ्यार मेटालॅक्झील हें कवकनाशक.
३)तांबेराःपाक्सिनिया सोरधाय ह्या कवकाक लागून जावपी ह्या रोगांत पानाच्या दोनूय वटांनी फोड येतात. हातूंत गंगा 4, डेक्कन आनी गंगा हे प्रकार मात रोगप्रतिकारक आसात.
(आ) खोडावयले रोगः१)खोडकूजःपिथियम अँफानिडरमेटम कवकाक लागून जावपी ह्या रोगांत ३ ते ४ पेरां कुसतात आनी उपरांत झाड मोडून पडटा. ताकालागून पीक-६-८ आठवड्यांचें आसतना जमनीचेर भरपूर प्रमाणांत कवकनाशक फवारपाक जाय.
२) काळी खोडकूजः बॉट्रिप्लोडिया फँसिओलाय कवकाक लागून जावपी हो रोग पीक तयारजावपाच्या अदमासाक जाता. हातूंत गंगा ५, गंगा १०१, जवाहर, किसान हे प्रकार रोगप्रतिकारक आसात.
३)गुलाबी खोडकूजः फ्युजेरियम मोनिलिफॉर्मी कवकाक लागून जावपी ह्या रोगाचीं लक्षणां परागणां उपरांत दिसूंक लागतात. हातूंत खोडाचो रंग गुलाबी जाता. कांडां मोडटात आनी कणसां बेगीन तयार जातात. हातूंत गंगा५, नवीन आनी श्र्वेता हे प्रकार रोगप्रतिकारक आसात.
इ)कणसांचो रोगः १)कूज २)काणी. हो रोग उस्टिलागो मा.डिस ह्या कवकाक लागून जाता.
व्हायरसजन्य आनी सुक्ष्मजंतूजन्य रोगः हाचेर रोगप्रतिकारक प्रकाराची निर्मिती हो एकच उपाय आसा. सुक्ष्मजंतूजन्य रोगांत खोडकूज हो म्हत्वाचो रोग. एर्विनिया क्रिसेन्थेमी ह्या सुक्ष्मजंतू पसून जावपी ह्या रोगांत झाडाचीं सगळीं पानां सुकतात आनी मुळाकडली कांडी कुसता-गंगा-२, कुलू थळावो, नवीन आनी श्र्वेता हे रोगप्रतिकारक प्रकार आसात. ए.कँरोटो व्होरा हो प्रकार झिई हाकालागून जावपी खोडकूज रोग उदक सांचिल्ल्या आनी गच्च पेरिल्ल्या शेतांत चड नुकसान जाता. हाका उदकाचो फाव तो निचरो करप गरजेचें आनी रोगप्रतिकारक प्रकारांची लागवड करप हे उपाय आसात. हातूंत सीएम. ६००, गंगा सफेद-२, सीएम. १०३, आनी सीएम. १०४ हे प्रकार रोगप्रतिकारक आसात.
मक्काःसौदी अरबातल्या हेजाज प्रांताचें राजपाटण आनी मुस्लिम लोकांचें सगळ्यांत प्रवित्र क्षेत्र. मुहंमद पैगंबर हाचोय जल्म मक्का शारांतूच जाल्लो. साउदी अरबातल्या ब्सिरात पर्वतांमदी मक्का शार वसलां. ६३० उपरांत मुहमंद पैगबरान हांगासावनूच इस्लाम धर्माची शिकवण दिवपाक सुरवात केल्ली, तेन्ना सावन हें शार इस्लामाचें मुखेल धर्मपीठ म्हूण प्रसिध्द आसा. मुस्लिम धर्मियांनी आपलें पाप मुक्त करचे खातीर एक फावटी तरी ह्या धर्मक्षेत्राक भेट दिवची अशी घारणा आसा. देखून हाजयात्रेच्या निमतान दर वर्सा वेगवेगळ्या देशांतले लाखांनी मुस्लिम लोग हांगा येतात.
मुस्लिम पंरपरेप्रमाण अब्राहम आनी इस्मायल हांणी ही अल्लाची पवित्र सुवात मानून थंय एकपवित्र शांतिक्षेत्र म्हळ्यार काबा बांदलें. मुस्लिम धर्म फांकारुंक लागतूकच, ह्या धर्मक्षेत्रांतली फातरी इमारत खूब खेपे मोडून परतून बांदिल्ली. बायबल रचणूकेच्या तेंपार हांगा साबार येमन जमाती राज्य करताल्यो. क्यरायश हाच्या काळांत शाराची खूब भरभराट जाल्ली. मॅक्का हें शार वेपारी केंद्र, धर्मपीठ आनी कविता उत्सव क्षेत्र म्हूण नामनेक पाविल्लें.
मुहंमद पैगंबरान आपल्या आध्यात्मिक ध्येयाचो प्रचार करतसावन ह्या शाराक धर्मीक म्हत्व प्रप्त जालें. सुरवेक ताका विरोध जावन
