तेंपार परदेशी भांडवल गुंतवणुकीक लागून हांगा उद्येगधंद्याच्या मळार बरीच उदरगत जाल्या. कृषिउत्पादनां, बांधकाम सामुग्री, विद्युत् यंत्रा, इलेक्ट्रॉनिकीय वस्तू, कापडवस्त्र उद्येग, येरादारी सामुग्री, शिमीट, शाबू, रबर वस्तू, फर्निचर अशे विंगड विंगड कारखाने हांगा आसात. देशांतल्या म्हत्वाच्या उद्दयेगांत प्रक्रियाउद्येग, अभियांत्रिकी उद्येग आनी हस्तउद्येग हांचो आस्पाव जाता.
मलेशियांत निर्यात वेपारांत मुखेलपणान अशुध्द खनिज तेल, रबर, लाकूड, पामतेल आनी कथिल हांचो आस्पाव जाता. आयात वेपारांत चड म्हत्वाचे पदार्थ म्हळ्यार येरादारी सामुग्री, यंत्रसामुग्री, निर्मिती उद्देगांचीं उत्पादनां.
येरादारी आनी संचारण :
व्दीपकल्पीय मलेशियांत, रस्ते आनी लोहमार्ग हांचो साबा आनी सारावाका परस चड प्रमाणांत विकास जाल्लो आसा. उत्तरेक थायलंडाचे शिमेसावन दक्षिणेक दिंगापूरमेरेन व्दीपकल्पीय मलेशियांतल्यान एक मुखेल मार्ग वता. केंद्रीय मार्ग क्वालालुंपूर आनी केलांग हीं दोन शारां जोडटा. केलातानांतलो जेली आनी पेराकांतलें ग्रीक हीं शारां जोडपी उदेंत- अस्तंत म्हामार्ग 1982त येरादारी खातीत उक्तो केलो. साबा हांगा डांबरी रस्त्यांचें जाळें आसून तांची वेवस्था भौशिक बांदकाम खात्याकडेन आसता. सारावाक हांगा रस्त्यांचें प्रमाण खूब कमी आसा. त्या रस्त्यांची देखरेख राज्य शासन पळयता. साबा आनी सारावाक हीं दोन राज्यां जोडपी रस्तो 1981 त उकतो जालो.
व्दीपकल्पीय मलेशियांत 787 किमी. लांबायेचो मुखेल लोहमार्ग अस्तंत दर्या-देगेतल्यान सिंगापूरसावन उत्तरेक बटरवर्थ शारामेरेन वता. बटरवर्थ लागशिल्ल्या बूकीट मार्ताजाम ह्या शारालागीं ह्या लोहमार्गाचो एक फांटो थायलंडाचे शिमेमेरेन वता आनी थंय थांयलंडाच्या राश्ट्रीय लोहमार्गाक वचून मेळटा. उदेंत मलेशियांतलो 526 किमी. लांबायेचो लोहमार्ग गेमास ते टूंपार ह्या गांवामेरेन वता. 1984 त लोकमार्गाचें आधुनिकीकरण पुराय जालें.
मलेशियांतल्या बंचरांचें संघशासित आनी राज्यशासित अशें वर्गीकरण केलां. केलांग, पिनँग, जोहोर बारू, क्रांटान हीं व्दीपकल्पीय मलेशियांतलीं मुखेल बंदरां आसात. कोटा किनाबालू, संडकान, टाआऊ, लाआड डाटू, कूडाट, सेम्पोर्ना आनी कुनाक हीं साबा राज्यांतलीं मुखेल बंदरां आसात. बिंतुल बंदर हें सारावाक राज्यांतलें बंदर आसा.
क्वालालुंपूर, कोटा किनाबालू, पिनँग, जोहोर बारु आनी कूचिंग हांगा मलेशियाचे मुखेल आंतरराश्ट्रीय विमानतळ आसात. आलॉर सेटार, ईपो, कोटाबारू, कोटा ट्रेंग्गानू, क्वांटान, मलॅका हे विमानतळ देशांभितरली हवाई येरादारी सांबाळटा.
मलेशियांत लोकसंख्येची घनता उदेंत मलेशियापरस चड आसा. पूण ती सगळ्याक एकसारकी ना. भितरल्या भागांत दाट रानाच्या देगणांनी आनी दोंगरी वाठारांनी ती खूब पातळ आसा. हांगा कांय हेडग्यो जमातीय दिश्टी पडटात. दर्यादेगेवयल्या मळांच्या प्रदेशांनी मात लोकांची दाट वसती आसा. अस्तंत दर्यादेगेर 70% परस चड लोकसंख्या आसून, उदेंत दर्यादेगेवेल्या कलांता त्रिभुज प्रदेशांत आनी ट्रेंग्गानू न्हंयेचे देगेर बरीच लोकसंख्या एकठांय आयिल्ली दिश्टी पडटा. साबा आनी सारावाक हांगाय अस्तंत दर्यादेगेर लोकवस्ती चड आसा. अस्तंत मलेशियांत 50,000 परस चड लोकसंख्या आशिल्लीं 10 शारां आसून साबा-सारावाक हांगा तीं दोन दोन अशीं आसात. चडशीं शारां दर्यादेगेवयल्या मळांच्या प्रदेशांतूच सांपडटात. उदेंत मलेशियांतले 75% लोक गांवगिऱ्या वाठारांनी रावतात. अस्तंत मलेशियाचे नागरी लोकसंख्येंत चिनी लोक चड आसात. पूण भारतीय लोक नागरी आनी गांवगिरे वाठार अशा दोनूय भागांत दिश्टी पडटात. अस्तंत मलेशियांतले वट्ट लोकसंख्येंतले 54% मले, 35% चिनी, 10% भारतीय आनी 1% हेर वंशीक गटाचे लोक आसात. साबा-सारावाक हांगा मले आनी मुस्लीम लोक दर्यादेगांनी आनी हेर लोक देगणांनी वा दोंगरी वाठारांनी रावतात. ह्या दोनूय प्रदेशांतले वट्ट लोकसंख्येंत थळाव्या जमातीचे लोक चड आसात. इबान. दायाक आनी मेलनाऊ ह्यो सारावाक हांगाच्यो आनी बाजाऊ आनी मुरूत ह्यो साबा हांगाच्यो थळाव्यो जमाती आसात. सेमंग जमातीचे लोक अस्तंत मलेशियाचे उत्तरेकडेन आशिल्ल्या रानांनी आनी साकाई जमातीचे लोक दोंगरी प्रदेशांनी सांपडटात. खूब आदल्या काळासावन जमीन आनी उदकामार्गांतल्यान जाल्ल्या स्थलांतराक लागून मलाया व्दीपकल्पांत विंगड विंगड भाशांचे आनी वंशाचे लोक सांपडटात. इस्लाम हो मलेशियांतल्या लोकांचो मुखेल धर्म आसून सगळे लोक मले इस्लाम धर्माचे आसात. देशांत धर्मीक स्वातंत्र्य आसा. चडशे चिनी बौध्द धर्माचे आनी कांय चिनी किरिस्तांव आसात.
मलेशियांत विंगड विगंड वंशाचे, धर्माचे आनी संस्कृतीचे लोक सांपडटात. पूण बौध्द आनी हिंदू धर्मांचो ठसो चड प्रमाणांत उदेल्लो दिश्टी पडटा. अशें आसून लेगीत दर एके मुखेल जमातीचें संस्कृतीक जिवित, सांस्कृतिक परंपरा आनी अर्थीक स्थिती विंगड विंगड आसा. मले लोकांत भाशिक, धर्मीक आनी संस्कृतीक एकवट आसा. चिनी लोकांत बौध्द आनी ताओ हे मुखेल धर्म आसात. चडशा चिनी लोकांचो जल्म मलेशियांत जाल्लो आसलो तरी तांणी आपली चिनी परंपरा तशीच बाळगून दवरल्या. भारतीय लोकांची लेगीत आपली स्वतंत्र समाजरचणूक आसा. मलेशियांतलें संस्कृतीक वेगळेंपण तांच्या घरांनीय दिश्टी पडटा. घराच्या बांदकामाचें सामान मुखेलपणान रानांतल्यान हाडटात. शारांनी आधुनिक पद्दतीचीं घरां आसात.
भास आनी साहित्य :
‘मले’ ही मलेशियाची राश्ट्रभास आसा. मलेशिया अस्तित्वांत आयिल्लें, तेन्ना इंग्लीश ही प्रशासनाची मुखेल भास आशिल्ली. पूण 1967 सावन मले ही प्रशासनाची मुखेल भास
