केलो. अर्जुनाक झुजामळार पळोवन दुर्योधन खोशी जालो. अज्ञातवास पुराय जावचे पयलींच पांडवांची वळख पटली, हाका लागून पांडवांनी परतून बारा वर्सां वनवास आनी एक वर्स अज्ञातवास काडचो अशें दुर्योधनान फर्मायलें. पूण पांडवांनी एक वर्साचो अज्ञातवास पुराय केला हें भीष्मान कौरवांक पटोवन दिलें. दुर्योधन आपलें सैन्य घेवन परत गेल्याउपरांत, पांडवांनी आपलें खरें रूप विराट राजाक दाखयलें. मुखार विराट राजान आपली धूव उत्तरा हिचें अभिमन्यूकडेन लग्न लावन दिलें. ही सगळी कथा ह्या पर्वांत सांगल्या.
उद्योगपर्व :
पांडव विराट नगरीसावन आयल्या उपरांत तांणी श्रीकृष्णाचे मध्यस्थीन कौरवांकडेन आपलें राज्य परत मागलें. पूण कोरवांनी तें मानलेंना. निमाणेकडेन आपलें राज्य मेळोवपाखातीर पांडवांमुखार झूज हो एकूच मार्ग उरलो. पांडव आपलेआड झुजाची तयारी करतात हाची जाणीव जावन कौरवांनी हेर राजांकडेन युती करपाक सुरवात केली. अशे रितीन दोनूय पंगडांनी व्हड सैन्य उबें केलें. सादारणपणान कुलू-कांगडा ते मध्य आशियामेरेनच्या राजांनी कौरवांक तेंको दिल्लो. मध्ददेश, विंध्यपृष्ठ, प्राच्यजनपद, अपरान्त आनी सौराष्ट्र हांगाचे राजा पांडव पक्षाक मेळ्ळे.
झूज टाळपाचो निमाणो उपाय म्हूण श्रीकृष्ण सात्यकी हाका घेवन हस्तिनापुराक गेलो. कौरवांचे सभेंत ताणें नमळायेन पांडवांक अर्दें राज्य दिवपाक सांगलें. पूण कौरव पांडवांक राज्याचो इल्लो कुडको लेगीत दिवपाक तयार ना जाले. कृष्णाचो हो निमाणो उपायूय निकामी थरलो. कौरवांचे सभेंतल्यान निर्शेवन भायर सरील्लो कृष्ण उपरांत कर्णाक वचून मेळ्ळो. कर्ण हो कुंतीचो लग्नापयलींचो चलो आसून पांडवांचो व्हडलो भाव आसा हाची जाणीव करून दिवन, कृष्णान कर्णाक पांडव पक्षाक मेळपाक सांगलें. पूण कर्ण दुर्योधनाचो लागींचो इश्ट आशिल्ल्यान ताणें हो प्रस्ताव मान्य केलो ना. श्रीकृष्ण शिश्टाय हे नामनेचे घडणूकेचें वर्णन ह्या पर्वांत आयलां.
भीष्मपर्व :
झूज टाळपाचे सगळे उपाय निकामी थरल्याउपरांत युधिश्ठिरान आपल्या भावांक झुजाची परवानगी दिली. दोनूय पक्ष आपआपलें व्हड सैन्य घेवन कुरूक्षेत्र मळाचेर उबे रावले. धूत खेळांत कौरवांनी केल्ल्या आपमानाचो बदलो घेवपाखातीर पांडव वनवासांत गेल्ले तेन्ना सावनूच तयारेक लागिल्ले. पूण झुजाक उबे रावल्या उपराणत आपल्याच गुरूचो, दायज्यांचो, तसोच भावांचो वध करप म्हळ्यार व्हड पाप करप हें येवजून अर्जून सुरवेक कौरवांआड झगडपाक तयार नासलो. पूण ह्या वेळार भगवान श्रीकृष्णान अर्जुनाक उपदेश करून झूज करपाक प्रवृत्त केलो. भीष्मपर्वांत श्रीकृष्णान अर्जुनाक उपदेश सांगलो तो भगवद्गीता नांवान प्रसिध्द आसून तो हिंदू धर्माचो एक पवित्र ग्रंथ आसा. भगवद्गीता ही ह्या पर्वाची एक व्हड देणगी आसा.
धृष्टद्यूम्न हो पांडवांचो सेनापती जाल्यार कौरवांनी भीष्माक सेनापती म्हूण नेमिल्लो. भीष्म पर्वांतली म्हत्वाची गजाल म्हळ्यार, झुजाच्या णवव्या दिसा भीष्मान केल्लो व्हड पराक्रम आनी उपरांत अर्जुनान केल्लो भीष्माचो वध. भीष्म हो एक पराक्रमी झुजारी आशिल्लो. हाका लागून ताका मारपाखातीर अर्जुनाक शिखंडीचो आदार घेवचो पडलो. धाव्या दिसा शिखंडी भीष्मुखार उबो रावलो. पूण आपूण बायलमनशेवांगडा केन्नाच झगडचो ना अशी भीष्मान प्रतिज्ञा घेतिल्ली. शिखंडी हो मुळांत बायल आशिल्लो आनी उपरांत दादलो जालो. हाका लागून भीष्मान शिखंडीचेर शस्त्र उबारलें ना. हे स्थितीचो फायदो घेवन, अर्जुन शीखंडीच्या आडसाक रावून भीष्माचेर बाण सोडीत रावलो. खूब बाण लागिल्ल्यान भीष्म रथांतल्यान सकयल पडलो. भीष्म जमनीचेर पडिल्लो तेन्ना दक्षिणायन आशिल्लें. तो इच्छामरणी आशिल्ल्यान उत्तरायण लागमेरेन ताणें प्राण सोडलो ना.
द्रोणपर्व :
ह्या पर्वांत द्रोणाचार्याचे झुजांतले कामगिरीचें वर्णन आसा. भीष्म सकयल पडल्याउपरांत दुर्येधनान गुरू द्रोणाचार्य हाका कौरवांचो सेनापती म्हूण नेमलो. ह्या पर्वांत द्रोणाचार्य हाणें रचिल्ल्या चक्रव्युहाचें आनी अभिमन्यू हाणें केल्ल्या व्हड पराक्रमाची व्हडवीक सांगल्या. द्रोणाचार्य सेनापती जाल्याउपरांत कौरव-पांडवांभितर भिरांकूळ झगडीं जालीं. ह्या झुजांत अभिमन्यू हाणें व्हड पराक्रम करून राजा शल्य आनी जयंद्रथ हाचें सैन्य काबार केलें. हाका लागून जयंद्रथ हाणें अभिमन्यूचो सूड घेतलो अशी प्रतिज्ञा केली. दुसरे दिसा अर्जन पयस गेला तें पळोवन द्रोणाचार्यन चक्रव्युहाची उबारणी केली. द्णाचार्य आनी अर्जुना खेरीज हेर कोणाकूच चक्रव्युहाविशीं म्हायती नाशिल्ली. चक्रव्युहाविशीं व्हडलीशी म्हायती नासतना लेगीत अभिमन्यू व्युहांत भितर सरलो. तेन्ना जयंद्रथाकडल्यान ताचो वध जालो. आभिमन्यू मेलो म्हूण अर्जुनाक खूब दुख्ख जालें. तशेंच जयंद्रथाची ताका तिडकूय मारली. तिडकीच्या भारांत दुसरे दिसा सूर्य अस्ताक वचचे पयलीं जयंद्रथाचो वध करतलो अशी अर्जुनान प्रतिज्ञा केली. दुसरे दिसा जयंद्रथाचो वध करपाक श्रीकृष्णान अर्जुनाक आदार केलो. जयंद्रथ वध जाल्याउपरांत त्या दिसा झुजाचे नेम मोडून मशालींच्या उजवाडांत रातचें लेगीत झूज चालूच आशिल्लें. त्या दिसा पांडवांचे वतीन भीमाचो पूत घटोत्कच हाणें व्हड पराक्रम केलो. घटोत्कच कौरव सैन्याक कसोच बाडगना तें पळोवन दुर्योधनाच्या सांगण्यावयल्यान कर्णान अर्जुनाखातीर राखून दवरिल्ल्या वासवीशस्त्राचो घटोत्कचाक मारपाक उपेग केलो. तेच रातीकडेन धृष्टद्युम्नान संद पळोवन द्रोणाचो शिरच्छेद केलो.
कर्णपर्व :
धृष्टद्युम्न हाणें द्रोणाचार्याचो वध केल्याउपरांत, दुर्येधनान तेच रातीकडेन कर्ण हाका कौरवांचो सेनापती म्हूण नेमलो. ह्याच वेळार भीम आनी दुःशासन हांचें भिरांकूळ गदाझूज पेटलें. धूत खेळांत पांडवांचो पराभव जाल्याउपरांत दुःशासन हाणें भर सभेंत द्रौपदीच्या न्हेसणाक
