बहाई समाजाचें फडारपण प्रशासकीय समिती आनी सल्लागर समिती करता. प्रशासकीय समिती वेंचून आयिल्ली आसता आनी सल्लागार समिती ही नियुक्त केल्ली आसता. प्रशासकीय समिती ही थळाव्या, राश्ट्रीय आनी संवसारीक मळावयल्या परिशदांनी जाल्ली आसता. ह्या परिशदांची निर्मिती वेचणूकांनी जाता. बहाई धर्मांत वेंचणूक हें एक अध्यात्मीक कर्तव्य मानतात. देखून तातूंत पक्ष उमेदवारी, प्रचार हांचो आस्पाव नासता. खंयूय णव बहाई एकठांय आयले म्हणटकच तांची थळावी परिशद तयार जाता. अशे थळावे परिशदेंतल्यान विशिश्ट पद्दतीन राश्ट्रीय संसद वेंचून काडटात आनी राश्ट्रीय परिशदांतल्यान संवसारीक मळावयली सर्वोच्च परिशद वेंचून काडटात. ह्या वेगवेगळ्या परिशदांच्या हातांत धर्मीक विशयाच्या त्या विभागाचे अधिकार आसतात. तांचेवतीन शिक्षण, अणकार आदी प्रकारांचो वावरूय करतात. ‘ईश्र्वरी कार्याचे हस्त’ ही सल्लागार समिती आसून तिचे वांगडी नियुक्त आसतात. शोघी एफेंडी हाणें आपले हयातींत नेमिल्ले हे हस्त हालीं ‘विश्र्व – न्यायमंदिर’ हे परिशदेचे सांगणेप्रमाण काम करतात. हे परिशदेन नेमिल्ली ‘काँटिनेंटल काऊंसिलर्स’ ही संघटना. हे संघटनटक आदार करपाक नेमिल्लीं सहाय्यक मंडळांय आसात. बहार्इंच्या मतान समित्यांची ही वेवस्था ईश्र्वरान निर्माण केल्या.
बहाई धर्माप्रमाण परमेश्र्वरान संवसाराची आनी मनशाची नोर्मिती केली. मनीस हो सर्वक्षेश्ठ प्राणी आसून ताचो आत्मो अमर आसता. परमेश्र्वराची पुजा करप आनी सत्त विकसीत अशे संस्कृतीची उदरगत करप हें मानवी जिवीतांचे उद्दिश्ट. परमेश्र्वर हो मानवी जाणविकायेचे पलतडीन आसा. लोकांकडेन संपर्क दवरपा तो प्रेषीतांच्या रुपान जल्म घेता. बहाई धर्मांतले प्रेषिताविशींचे मूळ विचार बाब हाणेंच मांडल्यात.
बहाई धर्माप्रमाण सगळे धर्म एकूच आसात. विश्र्वशांती, मानवजातीचो एकचार, विज्ञान आनी धर्म हांचेमदलो सुसंवाद, अंधश्रध्देचो त्याग, सत्याचो सोद हीं बहाई धर्माचीं म्हत्वाचीं उद्दिश्टां. राजकीय, अर्थीक, राश्ट्रीय, धर्मीक, वंशीक आदी सगळ्या पूर्वग्रहांक ह्या धर्माचो विरोध आसा. बायल – दादल्यचे समान हक्क, एक पत्नित्व, सक्तीचें शिक्षण, पुरयत संस्थेचें उच्चाटन, अर्थीक विशमतेचें आनी गुलामगिरीचें निर्मुलन हांचो ह्या धर्मान पुरस्कार केल्लो आसा. ह्या धर्मांत संन्याशी, भिक्षूक, मठस्वामी आदींक स्थान ना. घटस्फोटाक मान्यताय आसा, पूण लोकांक तेपासून परावृत्त करपाचो यत्न चलता. ह्या धर्मांत सेवाभावान केल्लें कार्य पुजे इतलें श्रेश्ठ मानतात. एकूच भास ही आंतरराश्ट्रीय भास म्हणून काडून वा निर्माण करून कायदेशीर शासनाचे आदेश पाळचे आदीं तत्वां ह्या धर्मांत सांगल्यांत.
बहाउल्लाच्या तत्वांचेर श्रध्दा आशिल्ल्या कोणाकूय ह्या धर्मांत प्रवेश मेळटा. तेखातीर कसलोच धर्मीक विधी ना. सदांच सकाळीं, दनपारां आनी रातचें अशी तीन खेपे प्रर्थना करची असो नेम आसा. बहाउल्लान अरबींत बरयिल्ली प्रार्थना खंयचेय भाशेंत म्हणूं येता. प्रर्थनेंत कर्मकांडाक म्हत्व नासून श्रध्देक म्हत्व आसा. प्रार्थना वैयक्तीक आनी समुदायीक अशी दोन तरांची आसता. वर्सांतलो निमणो बाबी म्हयनो हो उपासाचो म्हयनो. प्रत्येक बाबी म्हयन्याच्या पयल्या दिसा म्हणजेच दर एकुणीस दिसांनी बहाई लोक एकठांय येतात आनी ‘एकुणीस दिसांचो उत्सव’ मनयतात. ह्या वेळार धर्मग्रंथाचें वाचन करतात. तशेंच, प्रशासन, अर्थीक स्थिती आदीविशीं अहवाल सादर करतात. उपरांत एकठांय खाण खातात. वर्साचे 19 म्हयने आनी म्हयन्याचे 19 दीस ही बाब हाणें चालू केल्ली कालगणना बहाई धर्मान स्विकारल्या. नवें वर्स 21 मार्चाक सुरू जाता. बाब आनी बहाउल्ल हाचो जल्म, तांणी केल्ली घोशणा आनी तांचें मरण ह्या घडणुकांचे दीस मनयतात. ह्या धर्मान अंमली पदार्थ घेवपाक मनाय केल्ल्या.
बहाई प्राथनादेवळाक मशारिक-अल् अधिकार अशें म्हणटात. ही इमारत वाटकुळीशी आसता. तिचीं णव दारां हीं मनशाच्या
आनी संवसारांतल्या मुखेल अशा णव धर्मांच्या एकचाराचें प्रतीक. सगळ्या धर्मांचो एकचार दाखोवपाखातीर देवळाक एकूच घुमट आसता. ह्या देवळांतल्यान बहाई आनी हेर सगळ्या धर्मांच्या धर्मग्रथांचे वाचन जाता. हांगा परयत नासतात आनी धर्मउपदेशूय करिनात. थंय सगळ्या धर्मांच्या लोकांक प्रवेश मेळटा आनी तांचे इत्सेप्रमाण केन्नाय आनी कशेय पद्दतीन प्रर्थना करपाची परवानगी आसता.
तांचे पयलें देवूळ इष्काबाद (रशिया) हांगा बांदलें (1972). पूण तें भूंयकांपान नश्ट जालें. उपरांत विलेमिट (इलिनॉयस, अमेरिका), कांपाला (युगांडा), सिडनी (ऑस्ट्रेलिया) आनी फ्रँकफुर्ट (अस्तंत जर्मनी) ह्या सुवातींचेर देवळां बांदलीं. तेभायर, बहाउल्ला आनी अब्दुल बहा हांच्यो कबरी, बगदाद लागसारची रिजव्हान बाग, बाब हाचें शीराझ (इराण) नगरांतलें घर आदी थळां हीं बहाई लोकांचीं पवित्र स्थानां.
बहाउल्लाचे ग्रंथ हे बहाई धर्माचे मुखेल धर्नग्रंथ. ते अरबी आनी फार्सी भाशांनी आसात. बहाई धर्मांत एक म्हान प्रतीक मानिल्लें आसून ताका ‘सवश्रेश्ठ नामाचें प्रतीक’ अशें म्हणटात. ह्या प्रतिकांत विशिश्ट आकाराच्यो तीन आडव्यो ओळी आसात. तातूंतली ओळ परमेश्र्वराच्या
