नांव दवरलें आनी ताचे पालन-पोशण केलें.
मोझेस व्हडलो जातकच एकदां ताणें एक इजिप्शियन मनीस एका ज्यूचो छळ करतना पळयलें. ताणें रोखडेच च्या मनशाक जितो मारलो. फेअरोच्या हातांत सांपडचे पयलींच तो थंयच्यान पळ्ळो आनी जेथ्रो ह्या मीडियनच्या धर्मगुरूकडे आयलो. थंय ताणें त्या धर्मगुरूची चली झिप्पोरा हिचेकडेन लग्न केलें. तिका मोझेसापसून जेरशोम आनी एलिएझट हे दोन पूत जाले. थंयच मोझेसान चाळीस वर्सां मेंढरां राखपाचो वेवसाय केलो.
एकदां हीरेब दोंगराचेर मेंढरां चरयता आसतना मोझेसाक एके झिलींत उजो दिसलो आनी तरीकूय तें झोंप जळनासलें. तो लागीं गेलो तेन्ना ताका देवाचो साक्षात्कार जालो आनी इजिप्ताक वचून आपल्या भांवडाक सोडोवन हाडपाचो ईश्र्वरी आदेश ताका मेळ्ळो.तेप्रमाण तो इजिप्ताक आयलो .थंय ताका ताचो भाव एअरन मेळ्ळो . ज्यूंक सोडून दिवपाखातीर फेअराचों मन वळोवप कठीण आसा अशें दोगांय भावांक पटलें. मागीर मोझेसचे दैवी शक्तीक लागून येहोवान इजिप्ताचेर धा खेपे प्लेगच्यो धामी हाडल्यो .निमाणें इजिप्शियन लोकांनी ज्यंचो छळ थांबोवन तांकां सोडून दिले. सगळे ज्यू आपलीं मेंढरां घेवन सुएझचे दक्षिणेकडेन वसणूक करपाखातीर गेले. तांचें फुडारापण मोझेसान केलें. हो प्रसंग ‘एकझोडस’ म्हूण बायबलांत आनू इतिहासांत नामनेक पावला.
सिनाय हांगा सगळे आयले तेन्ना तांकां व्हड येवकार मेळ्ळो.हांगाच ह्या दोंगराचे तेंगशेर (जेबेल मूसा) मोझेसाक ईश्र्वरी साक्षात्कार जालो आनी देवान ताका आपल्यो धा आज्ञा दिल्यो .सिनाय दोंगराचेर मोझेस ४० दीस देवाच्या सांगतांत आशिल्लो.मागीर सकयल येवन ताणें आपल्या भांवडांक पत्रदेश हांगा व्हेले. थंयच्यान ३८ वर्सांउपरांत ते उदेंतेकडे गेले. एसौ आनी मोआब ह्या वाठारांतल्यान बरे भशेन वतकच ताचें वाटेर आडखळी आयल्यो. जॉर्डन न्हंय हुंपून पलतडीं कॅनन वाठारांत वचूंक मेळचेंना आनी आपलो अंतकाळ लागीं पावला अशें पळयतकच मोझेसान आपल्या सगळ्या भांवडांक आपोवन निमाणो संदेश दिलो .निमाणें सगळ्यांक आशीर्वाद दिवन आनी जोशुआक आपलो वारस नेमून मोझेस नेबो दोंगरावयल्या पिसगाह तेमकार गेलो आनी थंय ताणें पिरायेच्या १२०व्या वर्सा आपली कूड दवरली.
ज्यू धर्माप्रमाण येहोवन इझ्त्राएल राश्ट्र तयार करपाखातीर मोझेसाक प्रेशित केल्लो आनी ताचेवरवीं आपल्यो सगळ्यो आज्ञा तो ज्यू लोकांक कळयत रावलो. मोझेस हो स्वभावान खूब शांत आशिल्लो, अशें ताचें वर्णन सांपडटा ज्या काळांत मोझेसान आपल्या बांधवांचो एकचार घडोवन हाडलो, त्या काळांत येहोवा ह्या देवाचो नाममहिमा निकतोच सुरू जाल्लो. त्या काळांत मोझेसच्या यत्नांक लागून ज्यू लोकांनी ह्या देवाचेर विश्र्वास दवरलो. मोझेसान ज्यू लोकांमदीं एकचार घडोवन हाडलो. तांच्यांत राश्ट्रीय भावना निर्माण केली. धर्माची खरी कसवटणी विधी आनी पुजा हांचेर आदीरिल्ली नासून नैताक आचरणातेर आसा, ही नदर तांकां पयलीं मोझेसारकडल्यानूच मेळ्ळी.
मोझेसाच्या जिवितांतल्या घडणूकांचेर आदारीत चित्र –शिल्प आकृत्यो कितल्याशाच चित्रकारांनी तयार केल्यात.
मोटार वाहन कायदो:मोटार वाहनासंबंदीत मालकी,चलोवप ,नेम,विमो सारकिल्ल्या घटकांचो कायदो . १९१४ वर्सा भारतांत पयलो मोचार वाहन कायदो अंमलांत आयलो. ताचे उपरांत तातूंत जायते बदल केले आनी हालींच १९८८ वर्सा आनीकूय बदल आनी दुरूस्त्यो केल्यो. १९८४ वर्सा ह्या कायद्यांत बदल घडोवन हाडटना एका वावुरपी गटाची नियुक्ती केली. सध्या अस्तित्वांत आशिल्ल्या कायद्यांत २१७ कलमां आसात आनी तीं १४ भागांनी वांटिल्लीं आसात.
पयल्या भागांत ह्या कायद्याविशीं वापरिल्ल्या उतराच्यो व्याख्या पयलेच फावट शिकपेयाचो परवानो (Learners Licence ) ह्या उतराचो अर्थ सागंला . दुसऱ्या भागांत वाहन चालकांच्या परवान्याविशीं तजविजो केल्ल्यो आसात. तशेंच वाहन चलोवप्यांचे पिरायेचेर कांय निर्बंध घाल्यात . तिसऱ्या भागांत कंडक्टरांच्या परवान्याविशींचे नेम आस्पावतात.
चवथ्या भागांच वाहनांचे नोंदणी विशीं म्हत्वाच्यो तजविजो केल्यात . हातूंत नोंदणी करपाची सुवात,नोंदणी कशी करप , तात्पुरती नोंदणी,वाहनांची मालकी दुसऱ्याक सोंपोवपाची पद्दत हे विशीं पुराय नेम आसात . नव्या कायद्याच्या कलम ५९ प्रमाण केंद्र सरकाराक दर एका वाहनाची आयुश्यमर्यादा थारावपाचे अधिकार दिल्यात. वाहनांची ती पिराय सोंपतकच वाहन निकामी थरोवनपाची तातूंत तजवीज आसा. दिसानदीस उप्रासपी भिरांकूळ अपघात आनी जिवांची हानी वाटावपाखातीर केल्लो हो एक उपाय जावन आसा.
पांचव्या भागांत येरादारी वाहनांचेर नियंत्रण दवरपा संबंगान आनी वाहनाच्या परवान्याविशीम तजविजो आसात. नव्या कायद्याच्या ८०व्या कलप्रमाण कसल्याय परवान्याखातीर खंयच्याय वेळआर अर्ज करूं येता. हे दुरूस्ताआदीं फक्त contract carriage permit private carriage permit आनी खंयच्याय वेळआर मागूंक मेळटालें. तशेंच नव्या कायद्याप्रमाण येरादारी अधिकाऱ्यान एकाद्रो अर्ज न्हयकारलो जाल्यार अर्जदाराक ताची बाजू मांडपाची संद दिवपाक जाय . आनीक एक म्हत्वाची गजाल म्हळ्यार विशेश वा तात्पुरतो परवानो सोडल्यार , हेर परवान्यांचो काळ ५ वर्सांपरस उणो आसूंक फावना. तशेंच ह्या परवान्याचें ह्या पांच वर्सांच्या काळआंत नूतनीकरण करपाची गरज ना.
