Sulod sa simbahán adunay tumba nga gipatindog sa mga sakristán linibután sa mga kandilà nga inugbok sa mga kande- lerong kahoy. Ang tumba gihimò sa duhá ka talad nga linut-od ug pinutós mga panaptong maitúm nga binudlisan sa maputî; sa maóng panapton adunay mga kalabira nga gipamintal.
―¿Gipahanungód kanâ sa mga patáy kun sa mga kandilà ba? ―nangutana ang tigulang.
Ug sa pagkakita niya sa duhá ka batà, usá kanila may napulò ka tuig ug ang ikaduhá pitó ka tuig ang kagulangón, iyang giduol ug walâ na lamang mohulát sa tubág sa sakristán nga iyang gipa- ngutana.
―Mga batà, ¿mokuyog kamò kanakò? ― iyang gipangu- tana. ―Si nanay ninyo nagtaganá ug maayong panihapon.
―¡Dili pa kami papaulion, sinyor, sa sakristán mayór hang- tud sa ikawaló ang taknà! ―mitubág ang maguláng. ―Paning- lon ko karón ang akong suhol kay ihatag ko kang nanay.
―Aw, ¡diáy! Ug karón, ¿asa man kamó padulong?
Adto sa kampanaryo, sinyor, magbagting sa mga lingganay.
―¿Mosaká ba kamó sa kampanaryo? ...¡Pagbantay bayâ pag-ayo! Ayaw kamó paduól sa mga lingganay samtang maga-unós.
Ug ang tigulang migulâ sa simbahán humán niya sagnunoti pagtan-aw ang mga batà nga nanaká sa hagdan padulong sa coro.
Si Tasyo milugod sa iyang mga matá, mihangád sa langit ug nagkanayón:
―Karón dili na akó buút untà nga adunay linti nga mahulog.
Ug midukô siyá nga naghinuktok ug unyà milakáw padulong ngadto sa gawas sa lungsod.
―¡Hapit unà! ― gitawag siyá sa Kinatsilà sa usá ka tawo nga nanambo sa usa ka baláy.
Miyahat si Tasyo ug nakità niya ang usa ka tawo nga may katloán kun katlong-limá ka tuig ang kagulangón nga nagapahi- yúm.
―¿Unsa kanáng gibasa mo dihâ? ―nangutana ang tigulang dungan ang pagtudlò sa basahón nga gibitbit sa iyang gikasulti.
―Usá ka basahón nga nahiangáy kaayo niarong adlawa nga ginganlan Las penas que sufren las benditas ánimas del Purgatorio ―mitubág ang tawo nga nagapahiyúm.
