ang labing diyutay, kay si Gaffarel, human niya tun-i pag-ayo ang mga giasoy bahin niining butanga ni Platon, Xanto de Lidia, Plinio, Hermipos ug Eudoxo, nagtuo man nga ang Purgatoryo una kang Hesukristo ug duha ka libo ug lima ka gatus ka tuig.
Apan bisan hain niini ing atong tuhoan, ang matuod mao nga si Zarathustra nagahisgot na ug butang maagid-agid sa atong Purgatoryo ug nagtudlo siyag mga paagi aron ang tawo mahilikay ug dili mahisugba niadtong iyang ginatawag ug Purgatoryo. Ang mga buhi makahimo pagluwas sa mga kalag sa nangamatay sa sala, pinaagi sa pagbasa pipila ka bahin sa Avesta kun paghimog
mga maayong buhat, apan kinahanglan nga ang mag-ampo kadugo sa namatay nga iampo hangtud sa ikaupat ka kaliwatan. Ang pag-ampo himoon matag-tuig ug molungtad lima ka adlaw. Unya, diha nga kining tinuhoana migamot na sa hunahuna sa lungsod, gihimong patigayon sa iyang mga pari, ug kadtong Purgatoryo nga gipatuhoan ni Zarathustra gibuhat nga tadtaran aron sila makasapi. Gipatuhoan nila nga kon usa ka tawo mobayad kanila
ug usa ka derem, salapi kono nga diyutay dag bili, ang gidugayon sa silot sa kalag nga ilang iampo kunhoran ug usa ka tuig; apan, sanglit alang niadtong tinuhoana aduna may mga sala nga pagasilotan sukad sa tulo ka gatus hangtud sa usa ka libo ka tuig nga
pag-antus, sama, pananglit, sa pagbakak ang dili pagtuman sa saad, ubp., ang gisangputan mao nga ang mga paring guwatsi nakaluklok ug libo ka libo ka derem. Dinhi makakita na kamo ug
maagid-agid sa atong Purgatoryo, gawas sa kalainan sa duroha ka tinuhoan.
Usa ka kilat nga gisunod dayon sa usa ka masipang dalugdog, nakapatindog pagkalit kang Doray kinsa nangurus nga nagkanayon:
—¡Hesus, Maria y Hosep! . . . Tabi, biyaan ko una kamo kay magdaig ako ug lokay nga bininditahan ug magdagkot kandila sa perdon.
Ang ulan misugod pagbunok. Si pilosopo Tasyo, samtang nagatan-aw sa asawa ni Don Filipo nga milakaw, mipadayon pagsulti:
—Karon nga wala na siya dinhi, makahimo na kita paghubit niining butanga. Si Doray, bisan may diyutay nga pagka-matuhotuhuon, maayong katolika ug ako dili mahagugmang molangkat sa pagtuo sa kasingkasing sa tawo. Ang pagtuo nga putli ug walay kutikuti molahi sa pinutong nga pagtuo, ingon nga ang
