pagdali ang ganghaan ug milingkod siya tupad sa suga. Sulod
sa kagabhion masabug kaayo nga molakdop sa hunahuna sa tawo
mga tinuhoan nga walay hinungdan ug ang iyang mata lagmit
makakita ug mga anino sa kalag nga magapautaw-utaw sa kahanginan.
Misulay siya pagpangadye, sa pagpangilaba sa Birhen ug kang Bathala aron luwason sa kadaut ang iyang mga anak, labi na gayud si Crispin. Takulahaw lamang nahikalimot siya sa iyang pangadye, kay nagsamot handum sa panagway sa iyang mga bata, kadtong panagway nga iyang pagahimat-an ug pagahikatulgan. Apan sa kalit lamang milimbawot ang iyang balhibo ug misiga ang iyang mga mata, kay, ambut kon lamat ba lamang sa iyang hunahuna, nakita niya si Crispin nga nagabarog didto sa tupad sa abohan, sa dapit nga iyang pagalingkoran kon makigtabi kaniya. Niadtong higayona, si Crispin wala magatingog, nagsamot lamag tan-aw kaniya ug nagapahiyum.
—¡Anay, anay, ablihi ako! —nabat'i niya sukad sa gawas ang tingog ni Basilio.
Si Sisa nahimalingka ug ang anino ni Crispin nawagtang dihadiha.
