tawo nga mituo kang Bathalà, nakailá sa iyang mga katungdanan
alang sa katilingban, usá ka tawo nga dungganan ug matarong,
dilì gayud magahikog. Kiníng tanán gisulti ko sa waláy lipod-lipod, apan gililong ko ang ubán nga ania sa akong hunàhunà, ug
tungúd niini angayán nga imo akóng pasalamatan, parì Dámaso.
Ang tenyente mitalikód kang parì Dámaso ug mipadayon pagsulti:
—Sa paghiulî ni parì Dámaso sa lungsod nga iyang gikura han, humán dagmali ang alaut nga kuwadhutór, gipakalkal, niya ang lubóng niadtong tawhana, gipahabwà ang minatáy ug gipalubóng ambút diín. Ang lungsod sa San Diego mihilum lamang sa dakúng katalaw — diriyót da usáb hinuon ang nasayud sa gibuhat sa parì. Ang alaut nga namatáy walâ gayúd intawon bisan usá na lamang ka kadugò dinhi ug ang iyang bugtong anák atua karón sa Uropa; apan kiníng tanán miabút sa dalunggan sa Hal. Kapitán Henerál, ug, sanglit siyá maayog kasingkasing, nangayog silot alang sa makasasalà . . . ug si parì Dámaso gibalhin ngadto sa usá ka lungsod nga labíng maayo. Maó kanâ ang tanán. Karón, ambí sulayí konó paghan-ay kanáng akong giasoy.
Ug sa pagkahumán niyag sulti, ang tenyente milakáw dayon.
—Gikasubô kog dakû ang paghisgot, bisan walâ ko tuyoa sa buót, sa usá ka butáng nakapahimangód kanimo, parí Dámaso —matud ni parí Sibyla. —Apan kon ikáw nakabintahá sa pagbalhin mo sa laing lungsod . .
—¿Unsay nakabintahá? ¿Ang mausik sa pagsamot ug balhin . . . ang mga papel . . . ug ang mga . . . ug ang tanán nga mahawaní? ... — mitubág nga nagkanô-konô si parí Dámaso, walâ makapugóng sa iyang labihang kalagot.
Ngadto-ngadto ang tigum nahibalík sa kalinaw.
Adunay nangabút nga laing mga dinapit, ubán kanila mao ang usá ka Katsilang tigulang, maambong ug pamayhon, kuyog sa iyang asawa nga Pilipinhon, tigulang na usáb, pinakulong ang buhók, pinintalan ang nawóng ug nagasapút sama sa mga babayeng Katsilà.
Giabiabi silá sa kadaghanan. Si Doktor De Espadaña ug ang iyang asawa nga si Doktora Donya Victorina nanglingkod tipon sa ilang mga kaila. Pipilá sa mga magsusulat sa mantalaan
ug mga magpapatigayón nanaghimamatáy didto ug unyà nagpunay ug danggà-danggà, nalibog ang ulo unsay ilang buhaton.
