Benedícite[1] nga waláy usáng misabát. Tungúd ba kahá kay walâ lamang himatngoníâ kun tungúd ba sa laing hinungdan, nahipahát kang parì Dámaso usá ka liog sa manók nga walâ nay panit ug usá ka pakô nga gahì kaayo, tipon sa daghang kalbasà nga nanglutaw sa sabáw, samtang ang ubán hingpahatán mga paa ug dughan, labí na gayúd si Ibarra nga nakatag-iyá sa atáy ug kasingkasing. Si parì Dámaso nga nakakitâ niining tanán, igò lamang mihigop ug diyutay sa sabáw, gilusák-lusák niya ang kalbasà, gibundak ang kutsara ug unyà gisalindot ang pinggan. Si
parì Sibyla nalingáw uyamut pakigtabì sa batan-on nga bulagáwg buhók.
—¿Pilá na ka tuig karón sukád sa pagkawalâ mo dinhi? —nangutana si Laruja kang Ibarra.
—Hapit na mopitó ka tuig.
—Kon maó kanâ, tingalig nahikalimót na ikáw sa imong lungsod.
Walâ hinuon; ug bisan ang akong lungsod daw nalimót kanakò, akó kanunay nga naghandum kaniya.
—¿Unsay buút mo ipasabút nianà? —nangutana ang batan-ong bulagáwg buhók.
—Buút ko ipasabút nga usá na ka tuig karón nga walâ akóy balitâ nga nadawat gikan dinhi, ug maó nga karón nahisama akó sa usá ka langyaw nga walá masayud naunsa pagkamatáy ang iyang amahán.
—¡Ah! —matud sa tenyente.
—¿Diín man ikáw nga walâ man mopadalág hatud-kawat? —nangutana si Donya Victorina. —Sa pagkasál bitaw namò mipadalá man kamig hatud-kawat ngadto sa Peñínsula.[2]
—Sinyora, niining duhâ ka tuig dayon ko nang paulí, didto akó sa Amihanán sa Uropa: sa Alemanya ug sa Polonya nga sakop sa Rusya.
Si Doktor De Espadaña, nga walâ lamang magtingóg-tingóg, nakakitág higayón sa pagsulti.
—Na...kailá akó didto sa Espanya ug usá ka taga Polonya, taga... Va... Varsovia, nga ginganlan si Stadtnitzki,
