sa iyang parol, ingon man sa mga daayndayan nga ilang higugmaan ug magaagad usab sa gidaghanon sa iyang kuwarta, ug unya sug-an niya ug kandilang upús kon duna siyay higala kun pariyente nga sakristan, kun mopalit ba hinuon siya nianang kandilang mapulá nga pagadagkutan sa mga Insik sa ilang mga alampoanan.
Sa taliwala sa pasunding adunay mga "alguacil" ug mga "tenientes de justicia" nga nanagsuroy-suroy aron pagbantay nga ang mga laray dili mabugtò ni managpunsisók ang mga tawo, ug alang niining bubata gawión ang ilang baras nga ikusogkusóg nila pagbunal ug sa ingon niining paagiha maninguha sila paghinabang alang sa himaya ug sa kaanindot sa mga pasunding, ug sa ingon niana may mga pagtulon-an nga mapupo ang mga tawo ug makapadugang sa kaanindot sa mga buluhaton sa simbahan.
Samtang ang mga "alguacil" namunal sa ilang mga baras, ang ubang mga tawo, aron paghapoyhapoy sa nanagpakadawat ug mga bun-og, nanghatag ug mga kandila sa nagkalainlaing gidak-on, walay bayad sama sa mga bunal sa mga "alguacil".
—Ginoo Alkalde,— mihinay pagpangutana si Ibarra— gipamunalan ba kanang mga tawo agig silot sa ilang mga salá, kun gusto ba lamang gayud nga gipamunalan?
—Aduna ikaw ing katarungan, ginoo Ibarra!— misagbat ang Kapitan Heneral nga nakadungog sa pangutana;— kining talan-awon nga... linuóg makapahibulong sa tanang mahianhi gikan sa laing dapit. Angayan unta nga idilí kana.
Ambut ngano, ang unang santos nga nahitungha mao si San Juan Bautista. Sa pagtan-aw kaniya, daw makaingon kita nga ang kabantug sa ig-agaw sa Atong Ginoo wala kaayo mahala sa mga tawo; bisan matuod nga ang iyang nawong sama sa usa ka ermitanyo ug ang iyang mga tiil ug paa sama sa mga tiil ug paa sa usa ka dalaga, gitungtong siya sa usa ka karaang andas nga kahoy ug gilibutan sa pipila ka mga bata nga nanagdalà ug mga parol papel nga wala sug-ì ug nanagsamot bigni sa tagó.
—Alaut intawon!— nagkanayon si pilosopo Tasyo nga mitan-aw sa pasunding sukad sa dalan; wala magapulos kanimo ang imong pagpasiuna pagwali sa pagkatawo sa Atong Ginoo, ni ang pagduko ni Hesús sa imong atubangan! Walà magpulos
