kita makabaton dautang kabubut-on batok kaniya. Kon dili
pa tungud kang pari Damaso...
Ang kura mipasigpat pagkalit kang Maria Clara, nga namati apan nagadungaw gihapon sa papel sa musika nga gihikyad sa piyano, bisan gisamotan siyag lusi sa tago ni Sinang tungud sa iyang kahinangop sa pagpamati niadtong balita nga gisugilon sa kura; kon wala pa silay laing uban, dagway mosayaw unta ang higala ni Maria Clara.
—Si pari Damaso?...— nangutana si Linares.
—Oo— mipadayon ang kura nga wala mobulag pagtan-aw kang Maria Clara— si pari Damaso miingon nga sanglit... amahan kono siya sa bunyag, dili makatugot nga... apan adal, sa akong hunahuna kon si ginoo Ibarra mangayog pasaylo kaniya, ug niini wala ako magduhaduha, mahusay kanang tanan.
Si Maria Clara mitindog, namalibad ug misulod sa iyang lawak-pahulayanan kuyog ni Victoria.
—Nan, kon dili siya pasayluon ni pari Damaso? — nangutana si Kapitan Tiyago sa tingog mahinay.
—Sa ingon niana... si Maria Clara lamang ang mag-igo... kay si pari Damaso amahan man niya sa kalag; apan sa akong hunahuna magkasabut tingali sila.
Niadtong higayona nabati mga tinaguktok sa sapin, ug nahatungha si Ibarra sinunod ni iya Isabel; ang iyang pagsaka didti nakabahin sa mga hunahuna. Miyukbo nga mahinalangpon uyamut kang Kapitan Tiyago, kinsa nalibug kon mokatawa kun mohilak ba. Kang Linares igo lamang miyango1. Si pari Salvi mitindog, ug labihan kamahinalangpon ang iyang pagpigit sa kamot ni Ibarra, nga kini nahitingala uyamut.
—Ayaw kini ikahibulong—miingon si pari Salvi;— dili pa karon dugay gidalayeg ko ikaw.
Si Ibarra mipasalamat ug unya miduol kang Sinang.
—Diin man ikaw magluklok karong adlawa?— nangutana kini sa iyang sinultihan nga binata;— nagpangutan-anay kami pag-ingon: Hain kaha padulong kadtong kalag nga bag-ong gibunlot sa Purgatoryo? Ug tagsatagsa kanamo lainlaig tubag:
—Ikasulti mo ba unsay inyong mga tubag?
—Dili; kana maoy usa ka butang tinagoan, apan suginlan ko da ikaw kon magkahungoy kita pagsulti. Karon sultihi kami
