Page:Noli-Me-Tangere-Cebuano-Visayano-ni-Jose-Rizal-1962-N719c.pdf/51

ug naigô usáb siyá niadtong mga pulong kon sayóp pagkahubad sa pinulongáng gresyanhon: "Himayà kang Bathalà sa kahitas-an sa langit ug kalinaw alang sa mga tawo nga maayog kabubut-on dinhi sa yutà!", kay, sumalà sa atò unyang makità, dilì igò ang maayong kabubut-on aron malinaw ang atong pagpuyô dinhi sa ibabaw sa kalibutan. Ang mga tawong nanagtamay sa atong tinuhoan nanag-ingón nga si Kapitán Tiyagó hungóg nga pagkatawo, ang mga kabús usáb nanagtuo nga siyá palabilabilión tampalasan ug kusóg nga mopahimulos sa kalisúd sa mga makaluluoy, ug ang iyang mga sakop nanag-ingón nga siyá malupigon ug dilì buút nga supakon ang iyang kabubut-on. Apán, unsay hunàhunà sa mga babaye bahin kaniya? Sulod sa mga payág nga nipà adunay mga hungihong mabutangbutangon, adunay nakadungóg ug mga panghayhay, mga agulò nga nanghisagol sa hilak sa mga bata ng bag-ong nahimugsò. Usá ka dalaga gimutomutohan sa mga manggitahapon nga gipasipad-an ni Kapitán Tiyagò, kay daw nalubog ang iyang tinan-awán ug naminghoy ang iyang panagway. Apán kining tanán walâ makahukaw sa iyang pagkatulog ug walay dalaga ng nakatugáw sa iyang kalinaw. Ang nakahatag ug kaguól kang Kapitán Tiyagò, maó ang usa ka babayeng tigulang nga nakig-indig kaniya sa paghalad kang Bathalà ug gidalayeg kaayo sa mga parì, labáw sa pagdalayeg kaniya. Kadtong pag-indigáy ni Kapitan Tiyagò ug sa tigulang balo, manununod sa iyang mga igsuon ug mga pag-umangkon, nakaayo sa Simbahán, ingón nga nakaayo sa kadaghanan ang pag-indigáy kanhi sa mga bapór sa Pampanga. Kon si Kapitán Tiyagò mohatag sa Birhen usá ka sungkod nga salapî, dinayandayanan ug mga batóng mahál, si Donya Patrocinio mohatag usáb laing sungkod nga bulawan, dinayandayanan ug mga bató nga labí pang mahal; kon sa pasunding sa Birhen sa Nabal si Kapitán Tiyagò mougbok usá ka arkos nga maayong pagkadayandayan, pinunihán ug mga panapton nga mahál, binitayan daghang mga salamín ug mga sugâ, si Donya Patrocinio usáb mougbok laing arkos nga labing taás ug labing daghag mga dayandayan kay sa kang Kapitán Tiyagò. Apán dinhi, si Kapitán Tiyagò modangóp na sa iyang kalaki nga dili hitupngan: magpamisa siyá ug unyà magpabuhì dagkung luthang ug magpaduslit mga fuegos artificiales; niini, si

— 44 —