Walâ madugay ang batan-on nanaug sa hagdanán kinuyogan
ni Kapitán Tiyagò ug ni Isabel, samtang si María Clara misulod
ug nanirá sa iyang lawak nga alampoanan.
—Ipalihog akó pag-ingón kang Andeng nga hikayon niya ang baláy didto, kay moabút si María Clara ug si Isabel. ¡Maayong paglakáw! — matud ni Kapitán Tiyago kang Ibarra nga mitung- tong sa salakyanán nga milakáw usáb dayon padulong sa sawang sa San Gabriel.
Ug unyà, aron paglingaw kang María Clara nga nagahilák tupád sa larawan sa Birhen, si Kapitán Tiyagò miingón:
—¡Lakáw, pagdagkot didto ug duhá ka buók kandilà nga tagurhaón ka kahati, usá alang kang Señor San Roque ug usá alang kang Señor San Rafael, manlalaban sa mga magpapanaw! ¡¡Dagkuti ang lamparahán sa Nuestra Señora de la Paz y Buenviaje, kay adunay daghang mga tulisán. Maayo pa nga makapalít kitág upát ka kahati nga kandilà ug unóm ka daku nga lana kay sa pabayron unyà ug lukát nga daku!
