Duol sa daplin sa usá ka lanaw, taliwalà sa kaumahán ug kapilapilan, atua mahamutang ang lungsod sa San Diego. Kadtong lungsora mobaligyà sa gawás sa iyang mga abút, sama sa kamay, bugás, kapé ug mga bunga sa kahoy, kon ugaling dilì man ikabaligyà sa kubús kaayong bilí didto sa tindahan sa Insik nga magpahamulos sa mga kahilayan ug pagdanghag sa mga magbabaul. Sa higayón nga ang mga batà sa lungsod mangatkat sa tumóy sa kampanaryo sa simbahan nga gikaputan sa mga bagon, ang mga batà maniyagit sa kalipay inigsudong sa matahúm talan-awon nga ilang malantaw. Sa taliwalà niadtong mga baláy nga mipasad, inaptag nipà, tisà, sin ug mga dahon sa idyok, inuláng sa mga tanaman ug mga lagwirta, tagsatagsa kanila makatultol sa ilang payág. Daghan kaayo silág mga tulongdon: usá ka kahoy, usá ka punoang sambag, usá ka lindog nga lubí, usá ka punoan nga kawayan, bunga, usá ka krús. Makità didto ang subâ, sama sa usá ka dakúng bitín nga bildo nga nahikatulog binakbakan ug baníg nga malunhaw; masabà ang iyang hinaganas tungúd sa daghang mga bató nga nanagpatákpatak ug nakasabal sa pagdaligdig sa iyang tubig; sa unahan makità nga ang subâ hapit na mapikot tungúd sa mga gamút nga namilikis sa mga dagkung kahoy nga miturók ug nanag-atbang sa duhá ka tampi; dinhi dapít, ang yutà nga gidaligdigan sa tubig may diyutay nga pagkahanayhay ug ang subâ nawanang ug dili masulog. Sa layô malantaw ang usá ka payag nga gitarok sa tampi, daw walâ malisang sa bung-aw nga iyang gidung-awan ug sa makusóg hangin nga mohurós didto: kadtong payaga, tungúd sa iyang magagmayng mga haligi, nahisama sa usá ka dakúng langgam nga hatag-as ug mga tiíl nga nagaukóy sa mga mananap nga magadahík sa kalapukan aron iyang tukbon. Adunay mga taytayan nga mga lindog sa lubí kun kahoy nga walâ sapsapi sa panit, matuyà ug magaduyan-duyan kon latayan: ang mga bata nga mangaligò sa su-
