omna delegiti konocas de longe, e nur pos la aparo di nia jurnalo, qua esas simpla konsequanto di ca decidi, e qua esis anuncata ja en nia cirkulero di la 15a decembro. On povus do supozar, ke ca demiso esas efekto di ula extera influo, pri qua ni preferas tacar.
Asocio franca por Avanco di Cienci.
Ni ricevis de So Laisant la letro sequanta (france skribita) :
Paris, la 8 mayo 1908.
« A Siori Leau e Couturat, e c.
Siori,
Me havas honoro konocigar da vi ke en sa kunsido di hiere 7 Mayo la konsilantaro di l’ Asocio franca por Avanco di Cienci unavoce adoptis la rezolvo sequanta :
« La franca Asocio por Avanco di Cienci invitas So Laisant, sa riprezentanto en a Delegitaro e c., ekirar ek la Delegitaro e supresigar en olsa listi la nomo di l’ Asocio. Ica deklaras samtempe, ke ol restas ligita a l’ interesti di la linguo internaciona helpanta Esperanto. »
Me demandas, ke vi voluntez certigar a me ricevo di ca komunikajo, ed insertar la prezenta letro en la max proxima numero di via jurnalo Progreso.
Volez, aceptar, Siori, la certigo di mea tre distingita sentimenti.
En Post-Scriptum, So Laisant informas ni, ke sa kundelegito So Cugnin neplu esas membro di l’Asocio, e ke pro co il ne esas asociita a la citita rezolvo. Ni dubas, kad So Cugnin ompakaze su asocius a ca rezolvo, nam il informis ni, ke il demisis de la Esperantista Grupo di Paris en decembro 1907, « pro la fetishismo di sa chefi. »
Societo franca di Fiziko.
Per letro datizita de 9 Mayo 1908, Siori A. Broca e. R. Dongier, delegiti di la Societo franca di Fiziko, konocigis a ni la sequanta decido di ca Societo :
« La Societo di Fiziko permisas a sa riprezentanti ekirar ek la Delegitaro e supresigar sa nomo de la listi di ca Delegitaro, sed zorgante deklarar, ke ol restas ligita a l’ interesti di la linguo internaciona helpanta Esperanto ».
On rimarkos, ke ca decido esas redaktita ekzakte en la sama termini, kam la decido di l’ Asocio franca por Avanco di Cienci. La letro adjuntas, ke ca decido esis propozita da generalo Sebert, qua prezidis la kunsido, e ke « la konsilantaro adheris a sa idei ». La sola motivo, quan ol donas di ca decido, esas « la danjero qui semblas ad il (generalo Sebert) minacar l’ interesti di la linguo internaciona, pro la « incidenti » qui eventis okazione di la kunveno di la Komitato
