cipala adversi, nam li havas la sama skopo… Nulo esus plu absurda, kam interkombato di l’adheranti di la du dialekti ». Ta pacema ed autoritatoza paroli di nia prezidanto montras, ke ne sur nia latero mankas la « sociala sajeso ».
Morning Post (London, 17 febr.). — L’artiklo da So Jespersen en Science produktis kompreneble granda impreso en l’anglo-linguala publiko. Ol sugestis exemple a la yena jurnalo artiklo en qua on dicas, ke Ido esas destinata vicar Esperanto, malgre la « konspiro di silenco » ; e ke, fondita sur l’exameno di cetera proyekti, ol havas avantaji super omni.
Wäinämöinen, finna pacifista revuo (novembro 1909). — So Saarinen montris en nelonga artiklo, quante la L.I. povas servar l’ideo di la paco, ed anuncis, ke la redaktistaro de nun sequos kun atenco la movado por la L.I. ed aparte l’agado di nia Uniono. — (Januaro 10). La sama revuo insertis longa artiklo da So Saarinen, expozanta la historyo di la L.I., l’agado di la Delegitaro e la progresi di sa linguo. Il citas l’opinioni di Si Balint, Jespersen, Kock, Viklund : omna ta ciencisti agnoskas la supereso di Ido relate Esp. — En Recenso internaciona, on anuncas, ke de nun on rezumos singla numero en Ido en la sequanta numero. On rimarkigas, ke on ne povis uzar Esp. pro la supersigni.
Journal de la Manche (23 februaro, 2 e 9 marto) kontenas polemiko inter nia amiko So G. Baudre ed ula fanatika chefo, qua esis facinta en Coutances diskurso por Esp. e precipue kontre Ido. La fanatiko riprochas a l’Idisti parolar pri « Esperanto reformita ». So B. respondas, ke to esas la verajo, segun la decidi ipsa di la Delegitaro, e ke il havas la yuro nomizar su Esperantisto, segun la Deklaro de Boulogne, qua esas la charto di l’Fundamentismo. Pluse, il pozas ica simpla questiono : Quon vu respondos a la guvernanti, a qui vu tante fidas, kande li dicos a vu : « Prizentez a ni unesme linguo telegrafebla en omna landi ! »
Internacia Socia Revuo (marto). — Ni kolyas en ica « fidela » revuo kelka flori di Esperantulo : quo esas « okulturniganta klerikalestro » ? Quo esas « jesmerita forgesateco » ? « Meritata oblivyeso », dicus Ido. Quo esas « malfikslipulo » ? On trouzas la kilometrala kompozaji, tante konforma a la « spirito » di Esp. : « laboristmalamika kapitalistservistacho » (uf ! la lineo esas plenigata da ta 2 vorti, kun nur 3 altra : montris esti e Ne !) ; on parolas pri « militmalliberejpuno ! » Ed on akuzos Ido longigar la vorti, dum ke on misuzas la sufixi sen ula motivo : « determinigantaj kauzoj », « memkonservigho ». — Kompense, ni rimarkas pura Idajo : « seksuala problemo ». Ni volus savar, per qua. « naturala evoluco » l’Esp. vorto sekso genitis l’adjektivo seksuala ! On devis dicar : seksa, por respektar la Fundamento. On do ne timas l’exkomuniko e la boikoto ? L’ inquizitori dormas !
