— A ta bonega artiklo respondis So Hinrichsen (29 aprilo), penante defensar la sensprita argumenti di So S.‑G. Il konfesas, ke la supercitita texto esas plu hororigiva en Esp. kam en Ido, sed atribuas to a l’ortografio per h. Il asertas nur, ke Esp. esas plu praktikala kam Ido, pro ke ol havas nun plu multa adepti.
So Jönsson replikis (1a mayo), montrante ke la frazo « Min tante… » esas nur stupida joko, nam ol havas nula senco en Ido ipsa, kontre ke omna nia Esperantala texti havas naturala senco, e promisante « 1.000 spesmilojn » a ta qua malkovros ula senco en ta frazo. Il montras, ke la malbela fonetiko di Esp. naskas necese de l’uzo di j ed n quale finali en la substantivi ed adjektivi, e citas ica nuva texto komparenda, quan ni ne povas abstenar repetar hike :
| Sed kelkain semajnojn poste mi vidis la najbarajn knabojn metantajn grandajn rughajn makulojn kaj longajn bluajn striojn en chiujn miajn belajn novajn esperantajn lernajn librojn, kiujn valorajn kaj utilajn verkojn tiuj chi malbonegaj friponoj tuj jhetis, au sur miajn malplenajn malaltajn fojnejojn, au en siajn proprajn malsekajn kaj malpurajn krachujojn. | Ma kelka semani pose me vidis la vicena pueri pozar granda reda makuli e longa blua strii en omna mea bela nuva esperantala lernolibri, qua valoroza ed utila verkin ica abjekta friponi quik jetis, sive sur mea vakua basa feneyi, sive en sua propra humida e sordida sputovazi. |
(Pos tala komparo, la proceso esas ya judikita !) Pri la remedyacho di la h, So Jönsson respondas, ke ol esas la sola admisita da la Maestro ipsa, en manko di la supersigni, qui existas en preske nula imprimeyo di la mondo. Cetere, se irgu trovas en Ido ula difekto, lu povas libere kritikar ol e facar propozi a l’ « Akademio demokratale elektita », dum ke tala libera diskutado esas exkluzita de Esperantuyo. « A la vigilanta kritiko ed a la progreso, Esperanto opozas nur la suverena Maestro, la blinda kulto e la stagnado ».
Biella, 10 januaro 1910.
Estimata Sioro,
Vu ja agnoskis la supereso di Ido sur Esperanto, kad no ? Sed olta ne kontentigas vu tute, nam ol ne iris, en la reformi reali-
- ↑ Ica letro ne esis insertata en Discussiones, « libera diskuteyo » di So Peano. Pro to ni publikigas hike granda parto de ol [N. D. L. R.].
