Vu asertas, ke Ido ne esas la sama por omni ed omnaloke ; ke, exemple, la stilo di « Belga Sonorilo » ne esas ta di « Progreso ». Hike vu exajeras, kara Sioro. Diverseso di stilo o di penso tute ne esas diverseso di vorti. Me lektas reguloze preske omna idala jurnali e revui redaktata da Franci, Angli, Germani, e c. : me konstatas granda diverseso di stilo e mem di konstrukto en la vortordino, sed nultempe o tre rare diverseso di vorti. Omna Idani uzas nur la vortaro aprobita da lia kompetent Akademio, e to esas suficanta garantio kontre irga arbitriajo en la uzo di la vorti. L’ esencala kozo ne esas facar omna stili kompasatre egala, sed facar li klara, logikala, komprenebla e gramatikale reguloza por la max multi, segun la spirito di singla populo e la kapableso di singla parolanto o skribanto.
Esus ya tre pueratra pretendar, ke omna populi parolez e skribez segun fixigita, nechanjebla modelo ; sed, kontre, on devas pretendar, ke omni uzez la sama vorti, ed aplikez la sama reguli por ne krear kaoso e por ke omni povez facile interkomprenar.
Permisez a me fine expresar la deziro, ke balde su levez la dio, kande omna kombatanti dil grava problemo marchos kune e konkorde e laboros, ne por plura solvi, sed por un sola ed unika, t. e. por la max bona solvo, qua rezumesas per l’axiomo da Jespersen. Lor nia tasko esos milfoye plu facila ; ni povos cesigar nia mizeroza lukti e kanteskar la granda peano di la final triumfo. « Vivez la Linguo Internaciona Ido ! »
Kordyale vua
Franca profesoro, 43 yari, licencié ès lettres, diplômé d’italien, por perfektigar en Anglio sua pronunco di la angla linguo dum la venonta vakanci (agosto-septembro), deziras de nun korespondar kun angla familyo, ube il povus lojar e donar lecioni. Voluntez skribar (en angla, franca, italiana, ido od esperanto) a Sro L. Bousquet, prof. en kolegyo di Aubusson (Creuse, France).
L. de Guesnet (Pioniro, Saint-Brieuc, Francio) esos tre felica donar a nia samideani omna informi utila pri voyajo en Italio e Sicilio : adresi di samideani, hoteli, exkursi, preci, e c.
Ye fino di aprilo aparis :
Esperanto simplified (Ido), broshuro in-16 de 32 pagini, kontenanta introduco, gramatiko, texto en Ido (La dormanta belino) e radikaro analoga a nia Guidlibreti. Preco : 1 penny (che E. F Hudson, Birmingham ; editata da la Birmingham International Language Society).
Le gérant : L. Couturat.
PARIS. — IMPRIMERIE CHAIX (SUCCURSALE B), 11, BOULEVARD SAINT-MICHEL. — 1517-10.
