Ni don Custodio, a sikikigtot, intaliawna ti rupa na, ta kinita na no adda met maysa nga indio iti asideg a makang. ngeg ka dagiti sarsarita da. Naimbag a gasat, ta dagiti adda iti asideg, bin-ig da a taga taltalon ket dagiti dua a mangyurit (timonel) kas met la awan sabali a maitaltalekda, gapo kadagiti nagsikkusikkuan ti karayan.
-Ngem, apo Simoun...
-Mamatikayo, don Custodio, -intuloy a simamaga ni Simoun; sa la adda maaramid a naindaklan nga awan unay ado a kusikusi, no kasta ti ipakat. Kasta ti pannakaaramid dagiti Piramides, ti danaw Moeris ken ti Koliseo sadi Roma. Amin dagiti agindeg iti maysa a pangukuman lasatenda idi ti mangliwengliweng a kapanagan nga awitenda dagiti balbalon da a lasuna a pagbiag da; lallakay, agtutubo, ububbing inda idi agbunag kadagiti batbato, tikapanda ida, sa da ida baklayen, babaen ti aywan ti pagbaot dagiti agturturay; ket iti kalpasan na dagiti saan a matay, agsublida kadagiti il-ili da, no dida magaburan kadagiti dardarat ti ingget lawa a kapanagan. Sa man adda mapan a taga sabali a pangukumanen, santo man maysan, kasta a nagsisinnublatda iti bayat dagiti ado a tawtawen; ti aramid nalpas, ket ita, datayo intay ida pagsidsiddaawan, no intay agbaniaga; no intay sadi Ejipto ken sadi Roma, idaydayawtay dagidi ar-ari a Paraon, ti kapuunan dagiti Antonino... Mamatikayo: dagiti matay, ken dagiti maud-udi ti laeng napigsa ti ikkanda iti kalintegan.
-Ngem, apo Simoun, dagiti kakasta nga ar-aramid mabalinda ti mamataod iti kibor,-insungbat ni don Custodio, a di makaidna gapo iti pagturunganen ti sarita.
Kibor, ja, ja! ¿immingarda aya iti uray naminsan dagiti taga Ejipto?, ¿immingarda aya ken naasi a Tito dagidi kayaw a judio? ¡Ni, ni! ¡inpagarupko man nga ammuyo ti pakasaritaan ti lubong!
¡Awan duadua a ni Simoun, wenno naglabes ti kinapalangguad na, wenno awan sursuro na! Ti panangiparupa na ken don Custodio, dina ammo ti pakasaritaan ti lubong, Inapalalo unayen! Ket agpayso, ta ni don Custodio nasukit metten ket insungbatna:
-Saan a daga ti Ejipto wenno Judio ti yan yo!
-Ket toy a Ili saan a naminpinsan a immalsa,-innayon daydi dominiko a kas la mabutbuteng;-kadagidi al-aldaw a pannakapilit da nga agbunag kadagiti dadakkel a kaykayo nga inda aramiden a sasakayan, no saan kuma a gapo kadagiti praile...
