- !Ayat!, ?ania ka aya a bituen?
Iti sumuno nga aldaw, maysa a juebes, idi nganngani lumnek ti init, ni Isagani adda a magmagna iti nataraki a lansangan ni Maria Cristina, nga agturong iti Malekon, ta mapan aglungpal iti inpaay ni Paulita iti bigat a inda panagsarita. Daydi buinaro saan nga agngata nga inda pagsaritaan ti naaramid iti naudi a rabii, ket gapo ta sisasagana a duinawat iti pannakalawlawag ti kasdi ket gapo ta paggaannnuna met ti kinapalangguad ken kinatangsit ni Paulita, namnamaennan ti inda panagsina. Gapo itoy a mabalin a maaramid, inkuyugna dagiti dua a kakaisuna unay a sursurat ni Paulita kenkuana, dua kapirgis a papel, nga apaman la a pakabasaan iti sumagmamano kabatog a naisurat iti napardas, ado ti kur-ikur-it na ket saan pay a nasayaat ti ortograpia na ngein nupay kasta, inna ida iduldulin, daydi buinaro a napalpalalo pay ti ayat na ngem no surat kunra ni Safo wenno ni musa Polimnia.
Ti kasdi a pakinakem na a mangipatli iti ayat na a gapo iti kinatakneng na, ti pannakaammo na nga agsagabanto iti pait gapo iti panagtungpal na iti annong na, saan da a malapdan ti panangabbuyot ti nasaem a liday ken Isagani ken ti panangpanpanunot ken pananglaglagip na kadagidi ingget sayaat nga al-aldaw ken rabrabii a nasayaat pay a inda panagin-innarasaas kadagiti nasam-it a sasao iti yan ti rejas a entresuelo a naramenan kadagiti sabsabong, sasao a parparawpaw a iti daydi bumaro agbalinda a nadeggang ken napateg unay, ket pagarupenna pay a is-isuda laeng ti maikari nga imatangan ti kangangatuan a isip ti tao. Ni Isaga ni malaglagipna dagidi inda panagpalpallailang, dagiti rab rabii a kaadda ti bulan, ti peria dagidi bigbigat nga agsapa ti Disiembre, no malpas ti misa aginaldo, ti danom a bendita a kadawyanna nga igayat ken Paulita, iso a subalitanna iti maysa nga ikikita a napnuan ayat, ket agkintayegda man a dua no agdenna dagiti ramramay da. Naaweng a sensennaay, kas babassit a kukuitis ti agruar iti barukong na ket uma-
