Riemels un Döntjes/Wat is Unrecht?

[072]De lütje Töns, den ohlen Töns sien Söhn,
De dickste Jung' im ganzen Dorpe wöör,
Doch jüst de klöökste nich togliek, wie sick
Dat uuswies' öfters in'r Kinnerlehr.
Denn männigmal geew Töns en Antwoord da,
De wörklich twatsch un dull genoog kööm ruut,
So dat Schoolmester em daför tum Lohn
Denn man so swapps! geew een'n up siene Snuut!
Een Bispill van den veelen disser Aart
Will ick jo, miene Lesers, hier vertelln,
Un wenn ji dröwer hell nich lachen doht,
Künn driest ji för langwielig mi uutschell'n.
Schoolmester also mit den Katechism
Güng in sien Schoole up un dahl,
Un däh exameneern de Kinner denn,
De up de Banken, föftig woll an Tahl.
So kööm denn ook an uhsen dicken Töns,
Dat he den fragen däh, toletzt de Reeg;
„Was ist Unrecht?“ — so lutt Schoolmesters Frag',
Doch lütje Töns keek starr em an un sweeg.
„Nun denn, gieb Acht, mein Sohn“ — Schoolmeester spröök —
„Ich will durch Beispiel Dir erleichtern dies,
Und daß Du richtig dann antworten wirst
[073]Auf meine Frag', das hoffe ich gewiß!
Zum Beispiel also, Deine Mutter gab
Ein Butterbrot dort Deinem Schwesterlein,
Kaum aber ist die Mutter aus der Thür,
Eo springst Du hinter Deine Schwester drein,
Und nimmst ihr's Butterbrot mit einem Wupp! —
Nun sage mir, mein Sohn, was thust Du dann??
„Un — Un —“ — Töns sä: „ Ick fräät et up!“