Se̿ng-géng/Mǎ-tuo̿i Hŭ-éng/9
[ 22 ]
Di̿ 9 Cióng.
- Iǎ-Sú ciū iòng ṳ̌ing, gua̿ huǒi, da̿u cù-cī gâ̤ sê̤ng-dǐ.
- Iǔ giē nêng nà cì-ciă bāng-hóng gâ̤ nêng, dǎu hā pṳē-di̿ gó̤ng hā Iǎ-Sú-di̿ lâ̤; Iǎ-Sú chū-gi̿ng gṳ̀-huo̤̿i-nêng se̿ng gṳ̀, ciū iàu bāng-hóng gâ̤ nêng uā, Gṳ̌ing-ciě, nì mǒng kúing-séng, nì gâ̤ cò sia̿-tiāu làu. [ 23 ]
- Iǔ gǐ-ciă nāng-sṳ́ nêng bŭ-di̿ gō̤-uā; Iŏ̤ng nêng lūing gǔing cī chéng cī duōi.
- Iǎ-Sú dă̤-dí gṳ̀ séng-i̿, ciū uā, Nì ca̿-sū-dī séng di̿ siǒng iŏ̤ng ŏ̤ gâ̤ dī.
- Bǐ-piāng uā, Nì gâ̤ cò sia̿-tiāu, ā̤ ma̤̿, uā, Nì kǐ lâ̤, giǎng, iŏ̤ng liòng-iōng, nī cì-iōng ga̿ing ī uā nī?
- Giâ-gíng o̿ nì dă̤-dí nêng gâ̤ Gṳ̌ing da̿u si̿-gáing iǔ sia̿ cò gâ̤ gṳ̌ing-ba̿ng, (Iǎ-Sú ciū iáu bāng-hóng gâ̤ nêng uā.) Kǐ lâ̤, dé nì gâ̤ pṳē, giǎng chio̤̿ ko̤̿.
- Ŭ ciă nêng ciū kǐ lâ̤, giǎng chio̤̿ ko̤̿.
- Ŭ cèng cāi nêng chū-gi̿ng, ciū giáng kǐ lâ̤, gṳ́ ě̤ng-iāu nă Ciōng-Di̿, éng-ṳē Ciōng-Di̿ nà iŏ̤ng duōi gṳ̌ing-ba̿ng nă nêng.
- ¶ Iǎ-Sú giǎng iŏ̤ng-di̿ dāi-dā̤ ko̤̿, chū-gi̿ng cì-ciă nêng, miâng hǎng Mǎ-tuo̿i cō da̿u sṳe̿-bǒng-di̿, ciū iáu gṳ̀ uā, Nì lâ̤ gáing uòi. Gṳ̀ ciū kǐ lâ̤ gáing Iǎ-Sú ko̤̿.
- ¶ Iǎ-Sú cō da̿u Mǎ-tuo̿i chio̤̿-di̿ iè, iǔ cèng cāi siú-sṳe̿ iáu cò-nêng lâ̤, iáu Iǎ-Sú gìng gṳ̀ gâ̤ hă-sáing câi cō dŏ̤.
- Huă-lǐ-so̿ nêng chū-gi̿ng, ciū iáu Iǎ-Sú gâ̤ hă-sáing uā, Nì gâ̤ Síng-Sáing ca̿-sū-dī iáu siú-sṳe̿ gìng cò-nêng câi iè nī?
- Iǎ-Sú tia̿ng-nī-gi̿ng, ciū uā, Ngāing-că gâ̤ nêng ēng niōng í-sáing, iǔ bāng gâ̤ nêng ciū niōng í-sáing.
- Se̿ng-géng-di̿ uā, Uòi o̿ ta̿i nêng kǒ̤-lǐng gâ̤ dī, ēng o̿ hṳ̿ing-ci̿ gâ̤ dī, nì niōng ko̤̿ siǒng iŏ̤ng cì gṳ̿ dī gâ̤ i̿-su̿: éng-ṳē uòi lâ̤, ēng sī hǎng ngī-nêng, sī hǎng cò-nêng.
- Iŏ̤ng-cì-sî Iŏ̤-hu̿ing gâ̤ hă-sáing lâ̤ gi̿ng Iǎ-Sú, uā, Uòi iáu Huă-lī-so̿ nêng chū-chǔ ge̿ng-diū ēng iè, nì gâ̤ hă-sáing da̿u ēng ge̿ng-diū, iŏ̤ng sī gōng ciōng uā nī?
- Iǎ-Sú iáu gṳ̀ uā, Iáu séng-lô̤ng uā gé̤ng-hǐ gâ̤ nêng, iǔ séng-lô̤ng iáu gṳ̀ câi cì-dó, gṳ̀ nī-di̿ ŏ̤ sióng-séng nī? dǎing séng-lô̤ng giǎng gṳ̀ ŭ-di̿ nă nêng nà ko̤̿, ŭ sî-hē ciū ŏ̤ ge̿ng-diū ēng iè.
- Mǎu nêng nà séng bio̤̿, biǒ̤ giū gâ̤ í-ciông, éng-ṳē nà [ 24 ]lâ̤ biǒ̤ gâ̤ séng bio̤̿ da̿u ŏ̤ lōng huōi-tiāu giū gâ̤ í-ciông; puôi-tiāu ga̿ing duōi.
- Iǎ mǎu nêng nà séng ciǔ dó̤ng hā giū pṳê-dō-di̿: lâ̤-sī iŏ̤ng-gă̤-sĭ ca̿, pṳê-dō ŏ̤ gàu liè-tiāu, ciǔ lē chṳ̆ lâ̤, gìng pṳê-dō dú huōi-tiāu: nêng dú sī nà séng ciǔ dó̤ng hā séng pṳê-dō-di̿, liòng iōng ciū dú bǎu-dă̤-diū.
- ¶ Iǎ-Sú dō̤-di̿ uā iŏ̤ng dī gâ̤ sî-hē, iǔ cì-ciă gúing lâ̤ ba̿i gṳ̀, uā, Uòi á-niông-gṳ̌ing ka̿ing sǐ-tiāu, lâ̤ niōng nì ko̤̿ nà siǔ ga̿ hā gṳ̀ séng-di̿, gṳ̀ ciū ŏ̤ sáng kǐ lâ.
- Iǎ-Sú ciū kǐ lâ̤, gáing gṳ̀ ko̤̿, hă-sáing iǎ câi ko̤̿.
- Iǔ ciă á-niông-nêng huăi-lē gâ̤ bāng sí-nī nîng, lâ̤ Iǎ-Sú bù-ciă hē-di̿, mó̤ gṳ̀ gâ̤ í-ciông táu.
- Éng-ṳē gṳ̀ bŭ-di̿ gō̤-uā, Uòi lâ̤ niōng mó̤ gṳ̀ gâ̤ í-ciông, ciū ŏ̤ hǎu-tiāu.
- Iǎ-Sú chiá-dṳ̌ing-séng chū ŭ á-niông-nêng, ciū uā, Á-niông-gṳ̌ing, nì mǒng kúing-séng, nì gâ̤ se̿ng-séng í hǎu nì làu: ŭ-cì-dēng á-niông-nêng ciū hǎu-tiāu
- Iǎ-Sú da̿u ŭ gúing gâ̤ chiō̤, chū-gi̿ng dō̤-di̿ chṳé gǔ-siǔ, gu̿ iǔ cèng cāi nêng cèng nāu-iě lâ̤ gō̤ huáng;
- Iǎ-Sù ciū uā, Gṳè-kṳé; iŏ̤ng á-niông-gṳ̌ing ēng sī sǐ-tiāu, sī mì-chĭ-diō̤. Duōi-gá-nêng dú sia̿u gṳ̀.
- Ŭ duói nêng dāi chṳ̆ ko̤̿ làu, Iǎ-Sú ciū di̿ ko̤̿, káing-diū á-niông-gṳ̌ing gâ̤ siǔ, á-niông-gṳ̌ing ciū kǐ lâ̤.
- Iŏ̤ng dī da̿u ŭ mǔing-si̿-tī-di̿ cèng iông.
- ¶ Iǎ-Sú giǎng iŏ̤ng-di̿ dāi-dā̤ ko̤̿, iǔ liòng-ciă hăi-ciě gáing da̿u bò-hē-di̿ hǎng kǐ lâ̤, uā, Duōi-pĭ gâ̤ gṳ̌ing-só̤ng, kǒ̤-lǐng uòi.
- Iǎ-Sú nì chiō̤ làu, hăi-ciě ciū hā gṳ̀ mīng-chîng-di̿ lâ̤, Iǎ-Sú iáu gṳ̀ uā, Nì se̿ng uòi iǔ-nǎing-ge̿ ca̿ iŏ̤ng dī, ēng se̿ng? Hăi-ciě uā, Cṳ̌ à, uòi se̿ng.
- Iǎ-Sú ciū mó̤ gṳ̀ gâ̤ mì-ciú, uā, Cia̿u nì gâ̤ se̿ng-séng ŏ̤ ta̿i nì ca̿-chěng.
- Gṳ̀ gâ̤ mì-ciú ciū guáng kǐ lâ̤: Iǎ-Sú chiĕ-chiĕ ge̿ng-ga̿i gṳ̀, uā, Nì niōng siǎu-séng, ēng gǒ̤ng nă nêng dă̤-dí. [ 25 ]
- Ŭ liōng nêng chṳ̆ ko̤̿ da̿u ŭ mǔing-si̿-tī iông Iǎ-Sú gâ̤ miâng-siáng.
- ¶ Gṳ̀ ka̿ing-ka̿ing chṳ̆ ko̤̿, iǔ nêng iáu-diū cì-ciă ǎ-ciě nă gṳ̌ mî-diū hā Iǎ-Sú-di̿ lâ̤.
- Gṳ̌ dāi-tiāu làu, ǎ-ciě ŏ̤ uā dī: duōi-gá-nêng dú cèng gǐ-ī, gō̤-uā, Da̿u Ì-să̤-liĕ nêng dǐ-bíng cù-cě̤ng ēng-nǎing gi̿ng-diō̤ iŏ̤ng-gă̤-sĭ gâ̤ dī.
- Cǒng-lâ̤ Huă-lī-so̿ nêng uā, Gṳ̀ sī ka̿u-diū gṳ̌-uâng dāi-tiāu gṳ̌.
- ¶ Iǎ-Sú ciū ko̤̿ gŏ̤ sêng, gŏ̤ hióng-lǐ, da̿u lǐ-ba̿i-dǒ̤ng-di̿ háu nêng, gǒ̤ng tíng gŏ gâ̤ hǎu se̿ng-sǐ, í bă-sia̿ng gŏ̤ iōng gâ̤ bāng-kǔ.
- Chū-gi̿ng ŭ cèng cāi nêng, ciū kǒ̤-lǐng gṳ̀, éng-ṳē gṳ̀ kǔ-chǔ mǎu báing-bō̤, su̿-siōng cì-bó̤ng iông mǎu nêng ia̿ng ĭ-búing.
- Iǎ-Sú ciū iáu hă-sáing uā, Cǎu-ciě ì-cài cèng cāi, cāi-cǎu gâ̤ nêng siǎu.
- Gu̿-chu̿ nì niōng giǔ miâu-Cṳ̌ hǎng ca̿-dī nêng chṳ̆ ko̤̿ cāi gṳ̀ gâ̤ cǎu.